Mienš strakataści, bolš zielaniny i śmietnic. U Homieli zaćvierdzili dyzajn-kod
U Homieli zaćvierdzili dyzajn-kod — zbor pravił, jakija vyznačajuć, jak pavinny vyhladać fasady budynkaŭ, šyldy, prypynkavyja paviljony, dvary i inšyja elemienty haradskoha asiarodździa, piša Times.by.
Novyja patrabavańni raspaŭsiudžvajucca na ŭsiu terytoryju horada, ale asablivaja ŭvaha nadajecca histaryčnamu centru. Jany buduć abaviazkovymi dla architektaraŭ, prajekciroŭščykaŭ, budaŭnikoŭ, kiraŭnikoŭ žyllovych arhanizacyj i ŭsich, chto ŭpłyvaje na haradski vyhlad.
Pierad zaćviardžeńniem dakumienta ŭłady vynieśli jaho prajekt na hramadskaje abmierkavańnie, jakoje prachodziła z 20 žniŭnia da 15 vieraśnia. Žycharam prapanavali vykazać zaŭvahi i prapanovy, častku jakich, miarkujučy pa novych vizualizacyjach, uličyli.
Niahledziačy na aściarohi, što Homiel stanie całkam bežavym, kalarovuju palitru fasadaŭ pašyryli. Zabarona na ahresiŭnyja kisłotnyja kolery zachavałasia, adnak dazvolenych adcieńniaŭ stała bolš, i jany buduć jarčejšymi. Pry hetym koler fasada pavinien adpaviadać pašpartu budynka i spałučacca z ahulnaj kalarovaj hamaj vulicy.
Asobny raździeł pryśviečany šyldam. U histaryčnym centry kampanijam i brendam daviadziecca admovicca ad abjomnych śvietłavych korabaŭ na karyść asobnych abjomnych litar i simvałaŭ biełaha koleru ź lohkim chałodnym adcieńniem. Hałoŭnaja architektarka Homiela Łarysa Kavalova patłumačyła, što takija šyldy ŭžo vykarystoŭvajucca na praśpiektach Pieramohi i Lenina. Jany nie stvarajuć vizualnaha šumu i dazvalajuć lepš bačyć lapninu, kałony, karnizy dy inšyja architekturnyja detali histaryčnaj zabudovy.
U dyzajn-kodzie taksama značnaje miesca adviedziena azielanieńniu. Dla novych pasadak prapanujuć vykarystoŭvać biarozy, klony, sumach, lipy i tui. U znakavych miescach praciahnuć vysadžvać čyrvonyja klony, jakija ŭžo rastuć na płoščy Paŭstańnia, a taksama niezvyčajnuju dla miascovaha klimatu japonskuju viarbu «Chakura-Nišyki».
Dla vulic i hramadskich prastoraŭ buduć vykarystoŭvać jadłoviec, karlikavyja sarty chvoi i jełki, viečnazialony ibierys. Asnovu kvietnikaŭ składuć šmathadovyja raśliny, ale całkam admaŭlacca ad zvykłych pietunij nie płanujuć.
Vierahodna, u horadzie stanie bolš śmietnic. Pavodle novych pravił, ich buduć stavić kala kožnaha handlovaha abjekta i prypynkaŭ hramadskaha transpartu. Źniešni vyhlad śmietnic taksama zaćvierdžany: jany nie pavinny pieratvaracca ŭ prykmietny akcent haradskoj prastory.
Prypynačnyja paviljony buduć vyhladać bolš strymana, choć radykalnych źmienaŭ u ich afarmleńni nie praduhledžvajecca. Nie mienš za 70% viertykalnych pavierchniaŭ paviljonaŭ pavinny być śvietłaprazrystymi. Unutry abaviazkova raźmieściać viertykalny łajtboks z raskładam i schiemami maršrutaŭ.
U haradskim dekory pieravahu buduć addavać kamieniu, čyhunnamu lićciu, stali z paraškovaj afarboŭkaj, listoŭnicy abo termadraŭninie, a taksama architekturnamu bietonu. Pry vybary materyjałaŭ uličvalisia, u tym liku, mahčymaści miascovych pradpryjemstvaŭ.
Dyzajn-kod nie aznačaje, što ŭsie fasady i šyldy musiać źmianicca adrazu. Paśla zaćviardžeńnia dakumienta praduhledžany pierachodny pieryjad, na praciahu jakoha pradprymalniki i ŭładalniki budynkaŭ zmohuć pryvieści svaje abjekty ŭ adpaviednaść z novymi patrabavańniami.
U Smalavičach budujuć niezvyčajny šmatfunkcyjanalny kompleks Smala. Maje vyhladać jak u Niderłandach
U Słucku žančynu aštrafavali za pakinutyja kala śmietnicy dobraje adzieńnie i linoleum. Ludzi nie vytrymali, daviedaŭšysia pra heta
Jak ekśpierymient u Słucku pakazaŭ kamunalnikam, što pryčyna śmiećcia nie ŭ ludziach, a ŭ ich pracy
U Minsku vysadziać bolš za 40 tysiač chryzantem
Apublikavany novy hienieralny płan Homiela. Što ŭ im?
Ciapier čytajuć
Biełaruskija repietytary ŭ panicy: praz prablemy «Jandeksa» jany mohuć stracić materyjały, jakija napracoŭvali hadami15
Kamientary