Ukrainskija śpiecsłužby: My rychtavali apieracyju pa zatrymańni bajevikoŭ Vahniera

Ukrainskija śpiecsłužby rychtavali maštabnuju apieracyju pa zatrymańni hrupy bajevikoŭ PVK Vahniera, dla čaho vymanili ich u Biełaruś. Adnak śpiecapieracyja pravaliłasia, paviedamlajuć ukrainskija ŚMI.

Ukrainskija siłaviki bolš za hod tamu pačali apieracyju pa vyšuku i zatrymańni terarystaŭ. U składzie hrupy, jakuju pavinny byli schapić, byli ludzi, imavierna datyčnyja da katastrofy Boeing MN-17, Ił-76 pad Łuhanskim aeraportam, AN-26 kala Łuhanska.

U ramkach śpiecapieracyi bajevikoŭ naniali pa padroblenych dahavorach achoŭvać naftavyja vyški ŭ Vieniesuele. Padčas viarboŭki jany dali pad zapis infarmacyju ab złačynstvach na terytoryi Ukrainy, tamu što dumali, što pakazvajuć «pracadaŭcu» ŭzrovień «kvalifikacyi». Bajeviki pavinny byli vylecieć ź Minska. Im užo navat kupili kvitki.

Hrupa składałasia z 33 čałaviek, siarod ich byli 28 bajevikoŭ, jakich pavinny byli zatrymać. 9 ź ich byli hramadzianami Ukrainy. Nie ŭsie najmity słužyli ŭ viadomaj hrupie Vahniera.

Pa płanie, 24 lipienia hrupu pavinny byli pryvieźci z Maskvy ŭ Minski aeraport, kab jany nie zatrymlivalisia ŭ Biełarusi. 25 lipienia hrupa pavinna była vylecieć u Turcyju rejsam Minsk — Stambuł.

Pavodle zadumy, padčas hetaha pieralotu samalot pavinien byŭ ekstrana sieści ŭ adnym z ukrainskich aeraportaŭ, pakolki adnamu z pasažyraŭ nibyta stała b drenna. Hetuju rolu pavinien byŭ vykonvać ahient SBU. Pad vyhladam miedrabotnikaŭ ŭ samalot zajšła b hrupa śpiecnaza i zatrymała b «vahnieraŭcaŭ».

Adnak płan nie atrymałasia realizavać.

24 lipienia siłaviki dałažyli ab praviadzieńni finalnaj stadyi apieracyi ŭ ofisie prezidenta Ukrainy. Na dakładzie prysutničali Zialenski, kiraŭnik Ofisa Andrej Jarmak i inšyja.

Paśla dakładu Jarmak paprasiŭ adkłaści śpiecapieracyju. Jon spasłaŭsia na pieramovy z pamočnikam prezidenta Rasii i toje, što apieracyja mahła b sarvać abmien pałonnymi, jaki rychtavaŭsia ŭ toj čas, i pačatak pieramirja. Apieracyju adkłali na niekalki dzion.

Choć kiraŭniki śpiecsłužbaŭ kazali, što bajeviki ŭžo ŭ darozie, zarehistravanyja na rejs, spynieńnie apieracyi moža pryvieści da pravału.

Ale prezident Zialenski padtrymaŭ Jermaka i zahadaŭ pieranieści apieracyju na 30 lipienia.

Ukrainskija raźviedčyki padazrajuć, što paśla hetaha adbyŭsia źliŭ infarmacyi ŭ Fiederalnuju słužbu biaśpieki Rasii. Vynikam było zatrymańnie najmitaŭ u Minsku i ich pieradača Rasii.

• 0
• 0
• 0
• 0
• 0
• 0
• 0
• 0