Čamu Nacbank nie atestoŭvaje top-mieniedžaraŭ «Alfa-banka»? Tłumačać krynicy
Dniami stała viadoma, što 18 listapada atestacyju ŭ Nacbanku nie prajšoŭ vykanaŭčy dyrektar banka Alaksandr Babko. Da hetaha ŭviesnu kamisiju pry NBRB nie prajšli staršynia praŭleńnia Valeryj Smalak i vykanaŭčy dyrektar Kanstancin Zastolski. Što nie tak z top-mieniedžarami ŭ biełaruskaj dočki viadomaha rasijskaha banka?
Jak kažuć našy krynicy, usio pačałosia paśla vizitu Łukašenki na «Motavieła», kali toj skazaŭ: «Idei razarvać pradpryjemstva na kavałki, a zatym ich razdać pa bankach («Biełhazprambank», «Alfa-Bank» i inšyja) ja rasceńvaju jak antydziaržaŭnyja. Heta źniščeńnie pradpryjemstva».
Praź miesiac Nacbank arhanizavaŭ pazapłanavuju pravierku «Alfa-Banka», jakaja vyjaviła «parušeńni» ŭ dziejnaści hetaha banka z rasijskim kapitałam. Nieŭzabavie paśla hetaha adbylisia kadravyja źmieny ŭ arhanizacyi.
«Historyjaj na «Motavieła» Nacbank vyrašyŭ skarystacca, kab źvieści rachunki i pavučyć žyćciu ŭ Biełarusi mieniedžaraŭ rasijskaha banka, u jakoha z kiraŭnictvam Nacbanka skłalisia «krytyčnyja nieparazumieńni, — tłumačyć «Našaj Nivie» surazmoŭcy z bankaŭskaj śfiery.
— Naprykład, Nacbank prosić «Alfa-bank» kupić ablihacyi niejkaha dziaržaŭnaha zavoda.
Vielmi-vielmi važnyja ablihacyi, jakija ŭsie-usie kuplajuć pa svajoj voli, bo Nacbank ža prymusić nie moža — jon prosta «prosić».
A ŭ «Alfie» rajacca z Maskvoj, tyja kažuć — nu, kali prosta prosiać, to kuplać my ich, kaniečnie ž, nie budziem.
Abo «prosić» Nacbank prakredytavać niejkaje pradpryjemstva, jakomu bankir u zdarovym rozumie hrošaj nikoli nie daść. Topy «Alfy» rajacca ŭ Maskvie: u ich ža jość svajo načalstva, jakoje ich biare na rabotu. Tam kažuć: «Vy zdureli, jakija kredyty? Dziejničajcie zhodna z vašym płanam efiektyŭnaści».
«Heta nakłałasia na situacyju na «Motavieła», u jakoha majomaść u bankaŭskim zakładzie, hrošaj zavod nie zarablaje, a prosić jašče i jašče kredytaŭ, — praciahvajuć surazmoŭcy. — Jak było b u inšaj krainie? Bank by adabraŭ majomaść u košt daŭhoŭ, i ŭsio. Jakija novyja kredyty? Hetyja hrošy nikoli nie viernucca. Ale ŭ nas pastaŭlenyja kiraŭnikami čynoŭniki skardziacca, što ich rabujuć i nie dajuć kredytaŭ».
«Takim čynam, atrymaŭšy indulhiencyju na pazbaŭleńnie licenzij, «Alfu» bjuć puhaj, kab navučyć słuchać Nacbank u pryncypovych dla ahrarnaj ekanomiki pytańniach. Inakš jość pahroza pastavić tudy svaich, łajalnych Kałaŭru, mieniedžaraŭ. Bo łava ludziej z bankaŭskimi licenzijami ŭ Biełarusi davoli karotkaja, — kaža adzin z našych surazmoŭcaŭ. — Jak ja razumieju, «Alfa» hatovaja sihnał zrazumieć — Valeryj Smalak padaŭsia na pieraatestacyju i ŭsio idzie da taho, što jon vierniecca ŭ kresła staršyni praŭleńnia».
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary