«Heta moža kazać pra niedavierlivaść i fobii Pucina, naprykład, bojaź bijałahičnaj zbroi». Jak achoŭvajuć zdaroŭje prezidenta Rasii
Ni ŭvarvańnie va Ukrainu, ni čatyry pryščepki suprać karanavirusa, ni pasłableńnie pandemii nie admianili karancinu dla tych, chto kantaktuje z Uładzimiram Pucinym. Rehularna ŭ izalacyi siadziać piłoty i miedyki. Dla dostupu ŭ «čystuju zonu» sotni ludziej pa čatyry razy zdajuć PŁR-testy i dvojčy praviarajuć antycieły da karanavirusa. Biaruć i dadatkovyja analizy — na hryp, stafiłakok i hlisty. «Bi-bi-si» raskazvaje, jak achoŭvajuć zdaroŭje rasijskaha prezidenta i ŭ kolki miljardaŭ rubloŭ heta abychodzicca rasijskamu biudžetu.
«Kali dajšła čarha da mianie, my ź im [Pucinym] pavitalisia. Ja pieradaŭ jamu vinšavańni ad vieteranaŭ i kiraŭnictva našaj respubliki. Jon uśmichnuŭsia i pacisnuŭ mnie ruku», — tak apisvaje sustreču z Uładzimiram Pucinym hienierał Achat Jułašaŭ z Kazani.
Jułašaŭ paciskaŭ ruku rasijskamu prezidentu na paradzie na Krasnaj płoščy 9 maja 2022 hoda — u razhar vajny Rasii z Ukrainaj. Dziela hetaj sustrečy 94-hadovy mužčyna pravioŭ dva tydni na karancinie.
U Maskvu hienierał — vieteran nie Vialikaj Ajčynnaj, a afhanskaj vajny — pryjechaŭ 23 krasavika. Sustreli jaho «z usimi ŭšanavańniami i pasialili ŭ raskošnym maskoŭskim hateli», raspaviadaŭ jon paśla viartańnia miascovym ŚMI, nie chavajučy, što «znachodziŭsia na poŭnym zabieśpiačeńni na karancinie».
Hienierał Jułašaŭ byŭ adnym z pryblizna 400 čałaviek, jakija znachodzilisia z 24 pa 9 traŭnia na karancinie ŭ Maskvie dziela taho, kab pacisnuć ruku ci prosta nablizicca da Uładzimira Pucina.
Žyli jany, miarkujučy pa ŭsim, niadrenna: karancin prachodziŭ u dźviuch haścinicach u centry stalicy — piacizorkavaj «Załatoje kalco» i čatyrochzorkavym «Prezident-Ateli».
U 2021 hodzie paśla pryščepak ad karanavirusa Pucin staŭ bolš jeździć — naviedvać publičnyja mierapryjemstvy i sustrakacca ź inšymi suśvietnymi lidarami. Kožny raz za dva tydni da jaho pryjezdu rasijskija miedyki, piłoty i vadzicieli sadzilisia ŭ karancin.
Pa adkrytych danych, kramloŭskija struktury vydatkavali na heta kala 1,5 młrd rubloŭ, jašče nie mienš za 1,7 młrd absiervatary atrymali ŭ vyhladzie subsidyj.
«Takija miery biesprecedentnyja, ale pa ich niemahčyma zrabić vysnovu ab tym, ci jość u prezidenta prablemy sa zdaroŭjem, ci heta pierastrachoŭka abo «zornaja chvaroba», — skazaŭ Bi-bi-si izrailski aniestezijołah Michaił Fremderman, jaki da 2014 hoda pracavaŭ u Rasii.
Kanstancin Bałonaŭ, zahadčyk adździeła ŭ adździaleńni aniestezijałohii i reanimacyi ŭ klinicy Tufts Medical Center ŭ ZŠA, asabista lačyŭ ciažkich pacyjentaŭ z karanavirusam na aparatach ŠVŁ, jon ličyć, što padobnyja karancinnyja miery iracyjanalnyja.
Kanstancin miarkuje, što miedyki ŭ Kramli prosta bajacca mahčymych represij i pierastrachoŭvajucca: «Siadzieć u karancinie i zdavać šmatlikija analizy — ź miedycynskaha punktu hledžańnia heta paranojia abo realny strach. «Sprava daktaroŭ» moža vielmi chutka stać novaj realnaściu».
Ruskaja słužba «Bi-bi-si» vyśvietliła padrabiaznaści taho, jak padčas vajny i pandemii, jakaja idzie na spad, bierahuć zdaroŭje prezidenta i jak heta rabili da šyrokaha raspaŭsiudžvańnia karanavirusa — za apošnija hady ni na adzin bujny forum Pucin nie pryjazdžaŭ biez štata ŭračoŭ.
Patrapić na sustreču z Pucinym možna, tolki zdaŭšy mnostva analizaŭ. Jak minimum, dva analizy kryvi na antycieły i čatyry PŁR-testy ŭžo ŭ karancinie. Mahčymyja analizy na roznyja markiery zapaleńniaŭ u arhaniźmie, na inšyja infiekcyi i hlistoŭ.
Lotny atrad «Rasija», čyje ekipažy lotajuć z Pucinym, tolki na analizy vydatkavaŭ 125 młn rubloŭ. Z červienia 2021 hoda lotčyki i ściuardesy stali zdavać nie tolki PŁR, ale i ŭsie vidy daśledavańniaŭ na COVID-19. Štomiesiac jany zdavali da dźviuch tysiač terminovych PŁR-testaŭ i da 600 testaŭ na antycieły. A taksama — paŭsotni analizaŭ kryvi na bijamarkiery i 100-200 analizaŭ kału dla vyjaŭleńnia karanavirusa.
Uračy pastajanna dziažurać kala rezidencyi Pucina na Vałdai. Pad ich karancin navat zakryli hatel, jaki znachodzicca pobač z rezidencyjaj.
Adnak i da pandemii ŭ lubuju bujnuju pajezdku rasijskaha prezidenta supravadžaŭ sapraŭdny «desant» uračoŭ — infiekcyjanisty, pulmanałohii, kardyjołahi, ŁOR i inšyja. Naprykład, jany lotali praz usiu krainu na Zachodni i Arktyčny forumy.
Daktary, ź jakimi pahavaryła «Bi-bi-si», nazyvajuć hetyja miery zališnimi i ŭ pryncypie nie patrebnymi. U inšych krainach śvietu navat pažyłyja lidary ŭ asnoŭnym vykonvali tyja ž prafiłaktyčnyja miery, što i zvyčajnyja ludzi — hości i piersanał amierykanskaha Biełaha doma, naprykład, nie prachodziać dvuchtydniovy karancin i nie zdajuć kał na karanavirus.
U piersanału Biełaha Doma ZŠA i žurnalistaŭ u im akredytavanych karancin adsutničaje. Pierad pres-kanfierencyjami ŭ pieryjad pandemii rabili antyhien-testy, a padčas kanfierencyj žurnalisty znachodzilisia ŭ maskach. Na toj momant heta byli standartnyja praviły znachodžańnia ŭ hramadskich miescach. Pry hetym u pajezdkach prezidenta ZŠA supravadžaje siamiejny lekar, jaki vałodaje poŭnaj infarmacyjaj pra jaho zdaroŭje na vypadak nieabchodnaści i moža kaardynavać dapamohu na miescy.
Pa słovach doktara Bałonava z ZŠA, pavyšanyja miery biaśpieki mohuć prymianiacca dla pacyjentaŭ z panižanym imunitetam — naprykład, z-za chimijaterapii. Ale i ŭ hetym vypadku karancin i šmatlikija analizy — vidavočna zališniaja miera. Da taho ž Pucin na videa nie robić uražańnie ciažka chvoraha čałavieka.
Surazmoŭcy vydańnia vykazali niekalki hipotez adnosna «kramloŭskaha karancinu».
Mahčyma, heta prosta raśpiłoŭvańnie biudžetnych hrošaj i vynik starannaści padnačalenych rasijskaha kiraŭnika.
Jość i inšy varyjant: «Ź niekatoraj dolaj vierahodnaści heta moža kazać pra niedavierlivaść i fobii Pucina, naprykład, bojaź bijałahičnaj zbroi».
Navošta Pucinu chirurh-ankołah? Vyjšła rasśledavańnie pra zdaroŭje prezidenta Rasii
Ciapier čytajuć
«Byŭ upeŭnieny, što ja niedatykalnaja asoba dla rasijan». Pieršaje intervju Jurasia Ziankoviča na svabodzie10
Kamientary