U ZŠA ŭchvalili prymianieńnie pieršaj u śviecie vakcyny dla miedanosnych pčoł
U ZŠA ŭchvalili prymianieńnie pieršaj u śviecie vakcyny dla miedanosnych pčoł. Raskazvajem, dla čaho jana.
Ministerstva sielskaj haspadarki ZŠA (The US Department of Agriculture, ci prosta USDA) niadaŭna ŭchvaliła licenziju na vykarystańnie vakcyny dla miedanosnych pčoł suprać amierykanskaha hnilcu — bakteryjalnaha zachvorvańnia, jakoje asłablaje kałonii pčoł i zabivaje ich ličynki.
Pavodle paviedamleńniaŭ ministerstva, u ZŠA z 2006 hoda štohod nazirajecca imklivaje skaračeńnie papulacyi miedanosnych pčoł praz parazitaŭ, chvaroby i piestycydy, a taksama z pryčyny «sindromu razbureńnia kałonii», jaki prajaŭlajecca praz pakidańnie pracoŭnymi pčołami svajho rodnaha vulla i matki.
Pčoły ž u jakaści apylalnikaŭ adyhryvajuć važnuju rolu ŭ mnohich aśpiektach ekasistemy płaniety. Pa źviestkach Charčovaj i sielskahaspadarčaj arhanizacyi AAN, takija apylalniki, jak pčoły, ptuški i latučyja myšy, adkazvajuć prykładna za tracinu suśvietnaj vytvorčaści sielskahaspadarčych kultur.
Amierykanski hnilec, u svaju čarhu, ujaŭlaje saboj prablemu dla pčalaroŭ, bo hetaja chvaroba vielmi zaraznaja i nie moža być całkam vylečanaja. Adziny mietad lačeńnia patrabuje spalvańnia cełaj kałonii zaražanych pčoł i ich vullaŭ razam z apracoŭkaj antybijotykami ŭsich najbližejšych kałonij.
«Novaja vakcyna moža stać hrandyjoznym krokam napierad dla pčalaroŭ. Kali ŭ nas atrymajecca praduchilić infiekcyju, my zmožam paźbiehnuć darahoha lačeńnia i nakiravać našy resursy na inšyja važnyja elemienty padtrymańnia zdaroŭja pčoł», — zajaviŭ Trevar Taŭzer, adzin z čalcoŭ praŭleńnia Asacyjacyi pčalaroŭ štata Kalifornija.
Takoha ž mierkavańnia prytrymlivajecca bijatechnałahičnaja kampanija Dalan Animal Health, jakaja i raspracavała hetuju vakcynu.
«Vakcyna moža stać praryvam u abaronie miedanosnych pčoł», — upeŭnienaja Aniet Klajzier, hienieralny dyrektar Dalan Animal Health.
Pa infarmacyi kampanii, u vakcynie jość nieaktyŭnyja bakteryi, jakija vyklikajuć chvarobu amierykanskaha hnilcu. Kali dadać vakcynu (razam z bakteryjami) u korm, jakim pracoŭnyja pčoły kormiać svaju matku, to častka vakcyny nazapasicca ŭ jaje jaječnikach i novaje patomstva narodzicca ŭžo z pryrodžanym imunitetam. U vyniku tak možna značna pamienšyć śmiarotnaść siarod miedanosnych pčoł.
Pradstaŭniki Dalan Animal Health zajaŭlajuć, što kampanija płanuje raspaŭsiudžvać vakcynu abmiežavana siarod kamiercyjnych pčalaroŭ, i dadajuć, što sam pradukt, imavierna, možna budzie kupić u ZŠA ŭžo ŭ hetym hodzie.
Ciapier čytajuć
«Da akcyi dałučylisia tolki marhinały». Što pisaŭ u čatach paśla svajho vykryćcia kadebešnik, adkazny za biełaruskuju emihracyju1
Kamientary