Rasijski palityk: «Łukašenka pieršym pabiažyć ź jadziernaj zbrojaj zdavacca na Zachad». Hihin kinuŭsia na abaronu
Na rasijskim telebačańni ŭ žyvym efiry paskandalili rasijski i łukašenkaŭski ekśpierty. Nahodaju stała asoba Łukašenki.
Dyskusija adbyłasia na pieradačy «Miesca sustrečy» na NTB, u jakoj štodnia abmiarkoŭvajucca padziei, źviazanyja z vajnoj Rasii z astatnim śvietam. Vypusk vyjšaŭ jašče 27 sakavika, ale ciapier raźlacieŭsia pa sacsietkach.
Adnoj z tem pieradačy była zajava Rasii ab raźmiaščeńni jadziernaj zbroi ŭ Biełarusi.
Ekśpiertam ź biełaruskaha boku vystupiŭ Vadzim Hihin. Jon zapeŭnivaŭ aŭdytoryju, što taki krok Rasii vielmi napužaŭ krainy Zachadu. I što heta rašeńnie nibyta atrymała padtrymku biełaruskaha hramadstva — paćviardžeńniem svaich słoŭ jon pryvioŭ źmieny ŭ Kanstytucyi, dzie prybrali pałažeńnie ab biaźjadziernym statusie.
Pra jadziernuju zbroju parazvažaŭ i Barys Nadieždzin, jaki byŭ nazvany prezidentam Instytuta rehijanalnych prajektaŭ i zakanadaŭstva.
U pracesie abmierkavańnia jon skazaŭ: «Heta varjactva — davać Łukašenku jadziernuju zbroju». Paźniej Nadzieždzin patłumačyŭ:
«Ja tryccać hadoŭ pracuju z hetym voś čałaviekam — Łukašenkam. Jašče z časoŭ, kali pracavaŭ va ŭradzie. Łukašenku cikavić tolki adno — zachavańnie svajoj ułady. Dziela hetaha jon sfalsifikavaŭ vybary, zadušyŭ pratest. Tavaryšy darahija, ja jamu nie toje što jadziernuju zbroju… Jon pieršy, kali tut budzie kryzis ci smuta ŭ Rasii, jon pieršy pabiažyć z našaj jadziernaj zbrojaj zdavacca na Zachad».
Hihin jaho pierabiŭ: «Słuchajcie, jaki «pieršy»? My ŭ 2022 hodzie vystupili razam z Rasijaj».
Adnak Nadzieždzin nie supakojvaŭsia i praciahvaŭ kryčać, što Łukašenka pabiažyć pieršy, kinuŭšy Rasiju i Pucina.
Hihin vykazaŭ mierkavańnie, što pieršym pabiažyć Nadzieždzin i što jon prosta łže i 30 hadoŭ paŭtaraje adny i tyja ž fejki.
Nadzieždzin adkazaŭ: «Ja nikudy nie pabiahu. Ja tut budu. A voś Łukašenka…»
Hihin spytaŭ: «Čamu tut vy budziecie, a čamu vy nie na Danbasie?»
Palemika pierajšła ŭ ahresiŭnuju sutyčku. Nadzieždzin pierajšoŭ na «ty». Hihin jaho abazvaŭ chamam.
Łukašenkaŭskija ekśpierty ŭ apošnija hady — niaredkija hości rasijskich dziaržaŭnych šou. Tam jany časta abaraniajuć asobu Łukašenki.
Čytajcie jašče:
Hihin vystupiŭ za čystku kniharań — u dziaržaŭnych sietkach pačali prybirać cełyja sieryi knih
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary