Štučny intelekt kampanii OpenAI uzłamaŭ aŭstralijski dziaržaŭny partał Medicare, na jakim publikujecca statystyka ab sistemie miedycynskaha strachavańnia.
Premjer-ministr Entani Ałbaniz nazvaŭ toje, što adbyłosia, «nieprymalnym» i vykazaŭ kiraŭniku OpenAI Semu Altmanu svaju «nadzvyčajnuju zaniepakojenaść», piša Bild.
Asablivaje niezadavalnieńnie Ałbaniza vyklikała toje, što OpenAI zanadta doŭha nie infarmavała ŭrad Aŭstralii. Uzłom adbyŭsia jašče ŭ červieni, adnak ułady daviedalisia pra jaho tolki ciapier, u vieraśni. ŠI-ahient atrymaŭ dostup da publičnych i niepubličnych fajłaŭ sistemy strachavańnia. Pry hetym, pavodle ŭsioj vierahodnaści, asabistaja infarmacyja nie była zakranutaja, i asobnyja ludzi nie paciarpieli, zajaviŭ Ałbaniz.
Pavodle zadumy OpenAI, prahrama sa štučnym intelektam pavinna była šukać statystyku, źviazanuju sa śfieraj achovy zdaroŭja. Na niekalkich aŭstralijskich dziaržaŭnych sajtach jana dziejničała hetak ža, jak dziejničaŭ by zvyčajny karystalnik, zajaviŭ vice-premjer Ryčard Marłz. Adnak na partale Medicare ŠI nie znajšoŭ nieabchodnaj infarmacyi ŭ adkrytym dostupie, paśla čaho vyrašyŭ pajści inšym šlacham.
«ŠI-ahient znajšoŭ sposab abyści błakavańnie — jon, tak by mović, nie chacieŭ prymać «nie» ŭ jakaści adkazu», — zajaviŭ Ałbaniz.
Kolki dadzienych takim čynam atrymaŭ ŠI-złamyśnik, jašče vyśviatlajecca.
Taksama nieviadoma, ci atakavaŭ ŠI inšyja sajty ŭrada Aŭstralii.
OpenAI paviedamiła, što padčas unutranaj pravierki vyjaviła aktyŭnaść na niekalkich aŭstralijskich dziaržaŭnych sajtach: ŠI sprabavaŭ znajści ŭradavuju statystyku.
«Pry hetym našy madeli vykonvali dziejańni, jakich my nie mieli namieru dapuskać», — zajaviŭ pradstaŭnik kampanii.
Ciapier čytajuć
Najbujniejšaj u śviecie fan-supolnaściu Łedzi Hahi kiruje chłopiec ź Minska, jaki adsiedzieŭ za pratesty. Rasijanie paśpiašalisia zapisać jaho ŭ svaje1616
Kamientary