«A jakija da mianie mohuć być pretenzii?» BRSM i administracyja jurfaka BDU prakamientavali videa sa studentam u duchu siłavikoŭ
Pacikavilisia ŭ BRSM, Studenckaha sajuza i administracyi jurfaka BDU, ci viedajuć jany, što videa, na jakim treciakurśnika prymušajuć vybačacca, parušaje zakon.
Siońnia ŭ aficyjnym instahram-akaŭncie jurfaka BDU było apublikavana videa sa studentam na manier HUBAZIKa.
U im student-treciakurśnik na fonie emblemy BDU i vyjavy Fiemidy vybačajecca pierad administracyjaj fakulteta i BRSM.
«Ja, student treciaha kursa BDU, dazvalaŭ sabie raspaŭsiudžvać źviestki, jakija dyskredytavali administracyju jurydyčnaha fakulteta, a taksama źviestki, jakija hańbiać BRSM jurydyčnaha fakulteta. Svaju vinu całkam pryznaju, kajusia. Na asnovie svaich pamyłak rekamienduju moładzi pilna sačyć, što, kamu, dzie i ŭ jakoj situacyi jany havorać, a taksama pracavać na karyść svajoj krainy», — ahučvaje ŭ videa student tekst, jaki, vidavočna, jaho prymusili skazać.
Na storyz ź videa byli adznačany try arhanizacyi: BRSM fakulteta, prafbiuro i Studencki sajuz fakulteta.
Reposnuła heta videa tolki prafbiuro jurfaka BDU.
Viktar Suchaparaŭ, namieśnik dekana pa vučebna-vychavaŭčaj rabocie i sacyjalnych pytańniach, na zvanok «Našaj Nivy» zrabiŭ vyhlad, što nie ŭ kursie.
«Ja vas pačuŭ. Ščyra kažučy, nie bačyŭ jašče heta videa. Dziakuj za infarmacyju, ja padumaju, što zrabić», — adkazaŭ jon.
«Naša Niva» patelefanavała sakrataru BRSM jurydyčnaha fakulteta Kiryłu Panamarovu, kab daviedacca, ci ŭ kursie jon, što zapis takoha videa parušaje zakon.
«A jakija da mianie mohuć być pretenzii? Ja student fakulteta, jakija da mianie pytańni? Nie viedaju, braŭ udzieł BRSM ci nie braŭ, u vas niejkaja łžyvaja infarmacyja. Tam u storyz adznačana try arhanizacyi, heta pytańni nie da mianie. Nie viedaju, da kaho. Razumiejecie, ja ž prosta student jurfaka…» — adkazaŭ jon.
Pacikavilisia ŭ Kiryła, ci nie zabyŭsia jon, što źjaŭlajecca sakratarom fakulteckaha BRSM.
«Tak, słušna. Pra situacyju ja viedaju. A vy, skažycie, vałodajecie ŭsioj situacyjaj? Ja tolki bačyŭ, što tam adznačana try arhanizacyi: BRSM, Studsajuz i prafkam», — adkazaŭ jon.
«Naša Niva» źviarnułasia taksama da staršyni Studenckaha sajuza jurfaka BDU Paŭła Hardziejuka.
«Spadziajusia, vy razumiejecie, što nijakich kamientaroŭ ja nie budu davać pa hetaj situacyi. Mahu tolki vam paraić źviarnucca ŭ pres-słužbu. Kamientara nijakaha davać nie budu, tym bolš, što heta moj aktyvist, za jakoha ja adkazny. Nakont situacyi ja ŭ kursie, u kursie pra ŭsio», — adkazaŭ Pavieł Hardziajuk.
Apieratyŭna źviazacca sa staršynioj prafbiuro jurfaka BDU Kiryłam Paluchovičam nie atrymałasia.
Čytajcie taksama:
Što za «akciory» zdymalisia ŭ filmie ANT pra «terakt» na 9 Maja? Raskazvajem
Ciapier čytajuć
Pamiatajecie byłoha pamiežnika, jaki staŭ dalnabojščykam i ŭ Hiermanii pryznavaŭsia ŭ lubovi da Łukašenki? Ź im biada5
Kamientary
Dzie panujuć šeryja, ababaviazkova pryjduć čornyja© Struhackija.