Dva pamiežnyja punkty na miažy Litvy i Biełarusi buduć začynienyja
Razmova nie pra asnoŭnyja punkty propusku.
U adkaz na pryjezd u Biełaruś najmitaŭ z PVK «Vahnier» Litva płanuje zakryć dva z šaści punktaŭ propusku, paćvierdziŭ u piatnicu namieśnik ministra ŭnutranych spraŭ Litvy Arnoldas Abramavičus, piša BNS.
«U najbližejšy čas budzie pryniata rašeńnie ab zakryćci dvuch pahraničnych kantrolna-prapusknych punktaŭ. Kali siońnia ŭ Polščy praktyčna jość adzin kantrolna-prapuskny punkt, to ŭ nas ich šeść. Heta adna z prafiłaktyčnych mier — skaračeńnie z šaści kantrolna-prapusknych punktaŭ da čatyroch», — skazaŭ Abramavičus.
Płanujecca zakryć punkty propusku «Šumskas» («Łoša» ź biełaruskaha boku) i «Ćviaračus» (ź biełaruskaha boku — «Vidzy»).
Namieśnik kiraŭnika Dziaržaŭnaj pamiežnaj słužby Litvy Saŭlus Niekrašavičus zajaviŭ u piatnicu, što zakryćcio častki dziejnych pamiežnych punktaŭ na miažy ź Biełaruśsiu źnizić ryzyku sutyknieńnia z pahrozami.
«Kali my pamianšajem kolkaść incydentaŭ, jakija adbyvajucca, to adnačasova pamianšajem i pahrozy», — skazaŭ jon.
Pa słovach čynoŭnika, punkty, jakija płanujuć zakryć, adroźnivajucca abmiežavanaj zdolnaściu prapuskać transpartnyja srodki i ludziej.
Jon patłumačyŭ, što tam prachodziać nie ŭsie transpartnyja srodki, heta abumoŭlena infrastrukturaj daroh, punktaŭ.
«Susiedzi-palaki nie raz zakryvali pamiežnyja kantrolna-prapusknyja punkty, ciapier u ich dziejničaje adzin mižnarodny aŭtamabilny pamiežny punkt i try ci čatyry čyhunačnyja pamiežnyja punkty», — skazaŭ Niekrašavičus.
Ciapier čytajuć
Łukašenka apraŭdvajecca za ideju z pryjezdam 150 tysiač pakistancaŭ — heta, kab «zachavać naš narod»26
Kamientary