Farmaceŭtyčny hihant paviedamiŭ, što jaho novy vid terapii z vykarystańniem stvałavych kletak paśpiachova zmahajecca ź simptomami chvaroby na jaje pačatkovaj stadyi.
Niamieckaja farmaceŭtyčnaja kampanija Bayer paviedamiła, što ekśpierymientalnaja terapija stvałavymi kletkami, raspracavanaja jaje daččynaj kampanijaj BlueRock u ZŠA, zaśviedčyła prykmiety pasłableńnia simptomaŭ chvaroby Parkinsana. Pra heta dniami napisała ahienctva Reuters.
U miedycynskich testach udzielničali 12 čałaviek. Na pieršaj fazie vyprabavańnia stvałavyja kletki čałavieka byli pieratvoranyja ŭ niejrony, jakija vypracoŭvajuć dafamin. Dalej hetyja kletki impłantavali ŭ mozh dla nastupnaha adnaŭleńnia niejronnych suviaziaŭ, źniščanych chvarobaj Parkinsana. Pry hetym pacyjentam uvodzili rečyvy, jakija zaminali atakam imunnaj sistemy na novyja kletki-niejrony.
«Kampanija Bayer śćviardžaje, što praz hod paśla pačatku lačeńnia siem udzielnikaŭ, jakija prymali vysokuju dozu ekśpierymientalnych preparataŭ, u siarednim štodzionna kantralavali svaje simptomy na 2,16 hadziny bolš, čym heta byvaje zvyčajna, a pieryjady paharšeńnia stanu ŭ takich pacyjentaŭ skaracilisia na 1,91 hadziny. U toj ža čas tyja piać čałaviek, jakija prymali mienšuju dozu lekaŭ, kantralavali simptomy ŭsiaho na 0,72 hadziny bolš za zvyčajnaje, a pieryjady paharšeńnia stanu ŭ ich byli na tolki na 0,75 hadziny ŭ dzień mienšyja», — pieradaje ahienctva Reuters.
U Bayer adznačyli, što pacyjenty pieranosili lačeńnie dobra i bieź jakich-niebudź surjoznych prablem. Kliničnyja vyprabavańni ŭ hetym napramku praciahnucca jašče i ŭ 2024 hodzie.
Nahadajem, što chvaroba Parkinsana — heta zachvorvańnie hałaŭnoha mozha, vyklikanaje paškodžańniem niervovych kletak, jakoje pryvodzić da źnižeńnia ŭzroŭniu vypracoŭki dafaminu. Niedachop hetaha rečyva spryjaje paškodžańniu niejronnych suviaziaŭ. Heta, u svaju čarhu, stanovicca pryčynaj pastupovaj straty ruchalnaj funkcyi čałavieka. Siarod charakternych dla chvaroby Parkinsana simptomaŭ možna vyłučyć nastupnyja: tremar, skavanaść ruchaŭ, pavyšeńnie tonusu ciahlic i parušeńnie havorki.
Pavodle źviestak arhanizacyi Parkinson's Foundation, bolš za 10 miljonaŭ čałaviek va ŭsim śviecie pakutujuć ad zachvorvańnia Parkinsana. Lekaŭ ad hetaj chvaroby jašče nie isnuje. Adnak jość roznyja mietady, jakija dazvalajuć źmienšyć vastryniu jaje simptomaŭ. Naprykład, miedykamientoznaje lačeńnie, nialekavyja mietady i chirurhičnaje ŭmiašańnie.
Čytajcie jašče
U ZŠA zaćvierdzili navatarskija tabletki ad paślarodavaj depresii
Branzalety smart-hadzińnikaŭ zaražanyja vielizarnaj kolkaściu škodnych bakteryj — daśledavańnie
Vučonyja abviarhajuć mnohija praviły zdarovaha ładu žyćcia, jakija zdavalisia aksijomami
Kamientary