Ułady hetaj jeŭrapiejskaj katalickaj krainy chočuć karać škoły, jakija admianiajuć kaladnyja śpiektakli i simvoliku
«Dazvoł pieratvareńnia chryścijanskich śviataŭ u inšy biezabličny vid śviatkavańnia budzie ŭjaŭlać saboj dyskryminacyju ŭ dačynieńni da navučencaŭ i ich siemjaŭ, jakija vyznajuć relihiju bolšaści», — havorycca ŭ prajekcie zakona.
Pravy ŭrad Džordžy Miełoni maje namier pakłaści kaniec praktycy italjanskich škoł, jakija admaŭlajucca ad kaladnaj simvoliki i tradycyi relihijnaj raznastajnaści. Premjer-ministarka Italii zajaviła, što spynieńnie chryścijanskaj praktyki ź mierkavańniaŭ multykulturalizmu — heta ataka na nacyjanalnyja kaštoŭnaści, piša Bi-bi-si.
Zakonaprajekt, pradstaŭleny sienatarami ad jaje partyi «Braty Italii», praduhledžvaje štrafy dla kiraŭnikoŭ navučalnych ustanoŭ i vykładčykaŭ, jakija, niahledziačy na prośby baćkoŭ abo vučniaŭ, zabaraniajuć, u pryvatnaści, kaladnyja batlejki — cacačnyja madeli, jakija pakazvajuć naradžeńnie niemaŭlaci Chrysta — paŭsiudna raspaŭsiudžanyja kaladnyja instalacyi ŭ Italii i pa ŭsioj katalickaj Jeŭropie.
Uniesieny ŭradam zakonaprajekt nakiravany na abaronu «kulturnych karanioŭ» krainy šlacham zaachvočvańnia «tradycyjnych śviatkavańniaŭ» Kaladaŭ i Vialikadnia.
Zhodna z hetym zakonaprajektam, štrafam mohuć padvierhnuć dyrektaraŭ, jakija vyrašyli admovicca ad praviadzieńnia kaladnych śviataŭ.
«Užo niekalki hadoŭ my nazirajem nieprymalnyja i haniebnyja rašeńni niekatorych škoł, jakija zabaraniajuć kaladnyja sceny abo źmianiajuć hłybinnuju sutnaść Kalad, pieratvarajučy ich u niepraŭdapadobnyja «zimovyja śviaty», kab nie abrazić pačućciaŭ viernikaŭ inšych relihij», — skazała Łavinija Mienuni, sienatarka ad partyi «Braty Italii», jakaja pradstaviła zakonaprajekt.
U adpaviednaści z zakonaprajektam, škoły nie zmohuć pieraškadžać «inicyjatyvam baćkoŭ, vučniaŭ abo ŭpaŭnavažanych školnych orhanaŭ, nakiravanym na mierapryjemstvy, źviazanyja z tradycyjnymi śviatami, takimi jak Kalady i Vialikdzień, naprykład, ustalavańnie scen Rastva, śpiektakli i inšyja mierapryjemstvy, źviazanyja ź imi».
«Dazvoł pieratvareńnia chryścijanskich śviataŭ u inšy biezabličny vid śviatkavańnia budzie ŭjaŭlać saboj dyskryminacyju ŭ dačynieńni da navučencaŭ i ich siemjaŭ, jakija vyznajuć relihiju bolšaści, a taksama zamach na kaštoŭnaści i najhłybiejšyja tradycyi našaha naroda», — havorycca ŭ prajekcie zakona.
Hety krok padvierhnuŭsia burnaj krytycy z boku levych partyj i školnych prafsajuzaŭ.
Sama Miełoni nie raz padkreślivała, što katalicyzm lažyć u asnovie jaje italjanskaj identyčnaści.
U 2019 hodzie jana skazała: «Ja Džordžy, ja žančyna, ja maci, ja italjanka, ja chryścijanka. Nichto nie adbiare hetaha ŭ mianie».
Ciapier čytajuć
Pamiatajecie byłoha pamiežnika, jaki staŭ dalnabojščykam i ŭ Hiermanii pryznavaŭsia ŭ lubovi da Łukašenki? Ź im biada21
Kamientary