U Polščy iduć na pavyšeńnie prakurory, jakija 13 hadoŭ tamu vydali łukašystam źviestki pra rachunak Bialackaha
U polskuju Hienieralnuju prakuraturu viartajucca prakurory Hanna Adamiak i Kšyštaf Karšnicki. Jany sumna viadomyja z toj pryčyny, što ŭ 2011 hodzie ŭskosna spryčynilisia da vydačy biełaruskim śpiecsłužbam danych, na padstavie jakich aryštavali kiraŭnika pravaabarončaha centra «Viasna» Alesia Bialackaha. Kandydatury Adamiak i Karšnickaha prapanavaŭ novy hienieralny prakuror i ministr justycyi Polščy Adam Bodnar.
Paviedamlajecca, što hienieralny prakuror zrabiŭ pieršy krok da adnaŭleńnia na pasadach prakuroraŭ byłoj Hienieralnaj prakuratury, jakija ŭ 2016 hodzie byli pieraviedzienyja papiaredniaj uładaj na nižejšyja pasady.
U Hienieralnuju prakuraturu pryznačyli siarod inšych prakurorku rehijanalnaj prakuratury ŭ Varšavie Hannu Adamiak i prakurora rehijanalnaj prakuratury ŭ Łodzi Kšyštafa Karšnickaha. Ich imiony prahučali 13 hadoŭ tamu ŭ suviazi sa skandałam, kali danyja, vydadzienyja polskaj prakuraturaj režymu Łukašenki, kaštavali svabody Alesiu Bialackamu.
Polskaja prakuratura ŭ červieni 2011 hoda pieradała biełaruskamu režymu danyja ab polskim rachunku Bialackaha.
Mienavita prakurorka Hanna Adamiak tady razhledzieła zajavu biełaruskaha boku i, niahledziačy na admoŭnaje zaklučeńnie prakuratury ŭ Varšavie, nakiravała jaje da realizacyi. Adamiak pry hetym praihnaravała rekamiendacyju tahačasnaha hienieralnaha prakurora Andžeja Seremieta, pavodle jakoj da zajavak ź Biełarusi treba stavicca asabliva aściarožna, bo jany mohuć stać pastkaj dla miascovych apazicyjanieraŭ.
Tady Seremiet pryniaŭ rašeńnie pryciahnuć Adamiak da dyscyplinarnaj adkaznaści i pieravieści jaje ŭ inšaje viedamstva. Taksama toj skandał pryvioŭ i da adstaŭki kiraŭnika Departamienta mižnarodnaha supracoŭnictva ŭ Hienieralnaj prakuratury Kšyštafa Karšnickaha.
Aleś Bialacki tady byŭ asudžany da 4,5 hoda pazbaŭleńnia voli nibyta za niavypłatu padatkaŭ, a ŭ 2014 hodzie vyjšaŭ na volu pa amnistyi. Z 2021 hoda jon znoŭ za kratami, a ŭ 2022-m staŭ łaŭreatam Nobieleŭskaj premii miru razam z rasijskaj arhanizacyjaj pa rasśledavańni stalinskich złačynstvaŭ «Miemaryjał» i Ukrainskim centram hramadzianskich svabod.
Leanid Sudalenka: Što my budziem rabić, kali adnojčy ranicaj daviedajemsia, što nobieleŭski łaŭreat Aleś Bialacki pamior u turmie?
Padjom a 5-j ranicy, šmon, pramzona, znoŭ šmon. Adzin dzień z žyćcia źniavolenaha nobieleŭskaha łaŭreata Alesia Bialackaha
«Biełaruś — nie Rasija, i Łukašenka — nie Biełaruś». Pramova žonki Alesia Bialackaha Natalli Pinčuk na Nobieleŭskaj kanfierencyi miru — 2023
Ciapier čytajuć
Chrysta Hrozieŭ: ad ramantyka-radyjoamatara da čałavieka, jaki vykryŭ samyja zmročnyja tajamnicy HRU i FSB. Jak jaho vierbavała śpiecsłužba Luksiemburha i jak jon vymušany chavacca ciapier
Kamientary