U pačatku lutaha Pucinu prapanavali abmianiać kilera z FSB Vadzima Krasikava, adbyvaje termin za zabojstva ŭ Bierlinie, na dvuch amierykanskich hramadzian i Alaksieja Navalnaha. Uviečary 15 lutaha FBK atrymała paćvierdžańnie, što pieramovy znachodziacca na zaviaršalnaj stadyi. 16 lutaha Navalnaha nie stała. Pra heta raspaviała Maryja Pieŭčych u zvarocie, apublikavanym na kanale FBK.
Raniej niamieckaje vydańnie Bild pisała, što ZŠA, Rasija i Niamieččyna abmiarkoŭvali abmien Navalnaha pierad jaho śmierciu, jon nibyta «pavinien byŭ voś-voś vyjści na volu».
«U ich [pieramovach] udzielničali Maskva, Vašynhton i Bierlin. Uładzimir Pucin chacieŭ atrymać rasijskaha ahienta Vadzima Krasikava, jaki siadzieŭ u turmie ŭ Niamieččynie. Abmiarkoŭvałasia, što ŭ abmien Pucin vyzvalić Navalnaha», — pisała vydańnie.
Pieŭčych havoryć, što pra abmien damaŭlalisia praz znajomych palitykaŭ, praz samych bahatych ludziej na hetaj płaniecie, jakija ŭpłyvajuć na hetych palitykaŭ.
«Praź siabroŭ Pucina, takich jak Hienry Kisindžer (ja zhadvaju jaho, u rešcie rešt, jon miortvy, i jon usio roŭna nie dapamoh). Ale byli tyja, chto dapamahaŭ, i vielmi mocna. My sapraŭdy sprabavali ŭsio», — havoryć Pieŭčych.
Paplečnica Navalnaha zajaviła ŭ roliku, što im udałosia damovicca ab tym, kab abmianiać Navalnaha i dvuch hramadzian ZŠA na aficera FSB Vadzima Krasikava, jaki adbyvaje pažyćciovy termin za zabojstva ŭ Bierlinie.
Pra hetaha čałavieka, nie nazyvajučy proźvišča, u lutym rasiejski prezident Uładzimir Pucin kazaŭ u intervju Takieru Karłsanu.
Pucinu jasna skazali, što adziny sposab zajmieć Krasikava — heta abmianiać jaho na Navalnaha, kaža Pieŭčych.
Čamu ž Navalnaha nie vypuścili? Pieŭčych miarkuje, što Pucin ź nianaviści nie moh adpuścić Navalnaha.
«Heta absalutna niełahična, absalutna iracyjanalna, heta pavodziny varjata mafijozi. Pucin zvarjacieŭ ad nianaviści da Navalnaha. Pucin nienavidzić jaho nastolki mocna, što dziejničaje sabie na škodu i nasupierak ułasnym racyjanalnym intaresam.
Urešcie, Pucin dakładna viedaje, što Alaksiej Navalny moh by pieramahčy jaho. Što Alaksiej Navalny — heta budučynia, a jon, Pucin, — heta minułaje.
Pucin dakładna viedaje, što dziakujučy rasśledavańniam Navalnaha jon, jahonaja elita, jahonaja partyja «Adzinaja Rasieja», jahonyja siabry z FSB navieki zhańbavanyja. Dziakujučy Navalnamu Pucin uvojdzie ŭ historyju jak bajaźliviec, karumpavany čynoŭnik, złodziej, jaki pradaŭ krainu za załatyja joršyki dla ŭnitaza i vadzianuju dyskateku», — havoryć Pieŭčych.
Ciapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1616
Kamientary