Litoŭskaja mytnia zatrymała aŭtamabil, jaki pierahaniaŭ biełarus
Na miažy zatrymali BMW X1, jaki hramadzianin Biełarusi nabyŭ u Jeŭropie.
Nie pavieryli, što nabyŭ dla asabistaha karystańnia
Jak paviedamlajuć mytnyja orhany Litvy, kali biełarus prachodziŭ kantrol u punkcie propusku «Šalčaninkaj», mytniki na padstavie pradstaŭlenych danych paličyli, što jon pieravozić aŭtamabili ź ES u trecija krainy ŭ kamiercyjnych metach.
U vyniku BMW X1 koštam 26 230 jeŭra zatrymali. Na biełarusa, jaki vyvoziŭ aŭtamabil, skłali administracyjny pratakoł. Jaho vinavaciać u parušeńni mižnarodnych sankcyj abo abmiežavalnych mier, ustanoŭlenych zakanadaŭstvam Litvy. Čałavieku pahražaje štraf i kanfiskacyja aŭto.
Jak litoŭskaja mytnia mahła pryjści da takoj vysnovy?
Reč u tym, što Litva ŭžo kala dvuch hadoŭ nie prapuskaje praz svaju miažu aŭtamabili, nabytyja ŭ ES, kali za styrnom znachodzicca nie pakupnik aŭtamabila, a inšy čałaviek. Takich asob pryraŭnoŭvajuć da pieravozčykaŭ, a sankcyi zabaraniajuć biełaruskim pieravozčykam pracavać na terytoryi ES.
Kab abyści hetyja abmiežavańni i bieź pieraškod pierasiekčy litoŭska-biełaruskuju miažu, niekatoryja pierahonščyki nabyvali aŭtamabil na svajo imia, kožny raz afarmlajučy ekspartnyja dekłaracyi (JECH) taksama na siabie. Vierahodna, z hetaj pryčyny litoŭskim mytnikam udałosia adsačyć, što biełarus užo nie pieršy raz za karotki pieryjad času kuplaje ŭ Jeŭropie aŭtamabil i viazie jaho ŭ Biełaruś.
Ci možna kuplać aŭto dla siabie?
Biełarusy majuć prava nabyvać dla siabie aŭtamabili ŭ ES ź lubym abjomam ruchavika ŭ niezaležnaści ad koštu. Pry hetym, jašče na etapie afarmleńnia ekspartnaj dekłaracyi ŭ Litvie mytnia patrabuje ad hramadzian Biełarusi pisać raśpisku, u jakoj pakupnik paćviardžaje, što abiazujecca vykarystoŭvać mašynu dla asabistaha karystańnia, a nie dla pieraprodažu ŭ Rasiju.
Raniej «Našaj Nivie» adzin ź pierahonščykaŭ raspaviadaŭ pra kiejs, kali polskaja mytnia admoviłasia vypuskać aŭtamabili, jakija byli nibyta pryznačanyja dla ekspartu ŭ Kazachstan. Polski mytnik pry pieravozčyku znajšoŭ raniej ekspartavanyja hetaj firmaj mašyny ŭ prodažy na rasijskim sajcie.
Mahčyma, i ŭ hetym vypadku litoŭskim mytnikam udałosia znajści infarmacyju, jakaja dakazvaje, što ŭviezienyja raniej biełarusam mašyny «dla asabistaha karystańnia» znachodziacca ŭ prodažy.
Čytajcie taksama:
«Pry mnie šukali abjavy na Avita». Biełaruski pierahonščyk mašyn ź ES u Rasiju raskazaŭ, jak palaki znajšli ŭpravu na jaho
Čamu patok luksavych aŭto išoŭ praz Polšču i jak ich buduć uvozić ciapier
Nie tolki luksavyja aŭtamabili. Jakija jašče tavary mohuć zabaranić vyvozić z Polščy ŭ Biełaruś
Kamientary