Paplečnik Fica vyjhraŭ prezidenckija vybary ŭ Słavakii. Jon suprać vajskovaj dapamohi Ukrainie
Śpikier parłamienta i lidar partyi «Hołas — sacyjalnaja demakratyja» Pieter Pielehryni pieramoh na prezidenckich vybarach u Słavakii, umacavaŭšy ŭładu premjer-ministra Robierta Fica.
Pielehryni nabraŭ 53,12% hałasoŭ suprać 46,87% u pravacentrysckaha kandydata Ivana Korčaka (pavodle vynikaŭ padliku 100% hałasoŭ).
Fica, jaki pryjšoŭ da ŭłady čaćviorty raz u kastryčniku, paviarnuŭ zamiežnuju palityku krainy ŭ bok bolš prarasijskich pohladaŭ i inicyjavaŭ reformy kryminalnaha zakanadaŭstva i ŚMI, što vyklikała zaniepakojenaść z nahody pasłableńnia viaršenstva zakona, piša BBC.
U Słavakii hałoŭnaja vykanaŭčaja ŭłada naležyć premjeru, ale prezident moža nakładać vieta na zakony i asprečvać ich u Kanstytucyjnym sudzie. Prezident taksama pryznačaje sudździaŭ Kanstytucyjnaha suda, što moža adyhrać važnuju rolu ŭ vypadku asprečvańni reformaŭ Fica.
Kaalicyja Fica, u jakuju ŭvachodzić partyja, jakuju ŭznačalvaje Pielehryni, spyniła pastaŭki słavackaj zbroi va Ukrainu, a Fica krytykavaŭ pazicyju Zachadu ŭ dačynieńni da vajny, jakuju viadzie Rasija.
«Ja budu prezidentam, jaki budzie padtrymlivać urad u jaho namahańniach pa palapšeńni žyćcia ludziej, — zajaviŭ Pielehryni ŭ svaim pieradvybarnym štabie. — Ja zrablu ŭsio, kab Słavakija nazaŭždy zastałasia na baku miru, a nie na baku vajny».
Pielehryni śćviardžaŭ, što jaho supiernik na vybarach ličyć mahčymym uvod słavackich vojskaŭ dla dapamohi Ukrainie, Korčak heta admaŭlaŭ. Pieramožca vybaraŭ zajaviŭ, što nie budzie śpiašacca z fundamientalnymi źmienami ŭ źniešniaj palitycy. «Jak i inšy kandydat, ja harantuju, što my praciahniem zastavacca mocnym členam ES i NATA», — skazaŭ jon paśla hałasavańnia.
Korčak pryznaŭ parazu i pavinšavaŭ Pielehryni, ale pry hetym paabiacaŭ nie zabycca na toje, jak supiernik pieratvaryŭ jaho ŭ «kandydata vajny». Vyrašalnym faktaram na vybarach, na jaho dumku, staŭ strach.
Korčak padčas kampanii zajaŭlaŭ, što spynieńnie vajskovych pastavak Ukrainie pryviadzie nie da miru, a da pieramohi Rasii. Raniej jon byŭ pradstaŭnikom Słavakii ŭ ES i pasłom u ZŠA, a zatym zajmaŭ pasadu ministra zamiežnych spraŭ.
Pielehryni — daŭni sajuźnik Fica, ale bolš umierany. Razam ź Fica vosieńniu jon udzielničaŭ u farmavańni ŭrada.
Ciapier čytajuć
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu12
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary
Ale treba sprabavać niešta źmianić, bo śvietu budzie hapłyk !