«Pucin — dyktatar, patryjarch Kirył — pamahaty, rasijskija NPZ — zakonnyja vajennyja celi» — rezalucyja PARIE ŭ suviazi z zabojstvam Navalnaha

Parłamienckaja asambleja Rady Jeŭropy vypuściła rezalucyju ŭ suviazi z zabojstvam Alaksieja Navalnaha ŭ kałonii 16 lutaha. Jaje pryniali 17 krasavika, tekst dakumienta źjaviŭsia na sajcie PARIE siońnia, piša «Mieduza».

U pryniatym dakumiencie skazana, što rasijskaja dziaržava «pieraśledavała i ŭ kančatkovym rachunku zabiła» Navalnaha za toje, što jon ustupiŭ u apazicyju režymu Uładzimira Pucina. Asambleja ličyć, što ŭłady RF «niasuć poŭnuju adkaznaść za zabojstva Alaksieja Navalnaha, jaki padvierhnuŭsia katavańniam, biesčałaviečnamu i źnievažalnamu abychodžańniu».

PARIE zaklikała ŭvieści sankcyi ŭ dačynieńni da ludziej, jakija niasuć adkaznaść za pieraśled i katavańni Navalnaha. Asambleja apublikavała «śpis Navalnaha», u jakim pieraličanyja imiony bolš za 50 čałaviek. U pieralik, u pryvatnaści, uvajšli supracoŭniki kałonij, palicejskija, prakurory i sudździ, a taksama praŭładny błohier Illa Ramiasło.

U svajoj rezalucyi PARIE zajaviła, što pry kiravańni Uładzimira Pucina Rasija pieratvaryłasia ŭ dyktaturu (Asambleja ŭžo rabiła takuju zajavu), a režym «całkam pryśviaciŭ siabie vajnie z demakratyjaj».

Režym Uładzimira Pucina prytrymlivajecca nieaimpieryjalistyčnaj ideałohii «ruskaha śvietu», jakuju Kreml pieratvaryŭ u instrumient raspalvańnia vajny.

Hetaja ideałohija vykarystoŭvajecca dla źniščeńnia reštkaŭ demakratyi, militaryzacyi rasiejskaha hramadstva i apraŭdańnia zamiežnaj ahresii z metaj pašyreńnia miežaŭ Rasiejskaj Fiederacyi za košt uklučeńnia ŭ jaje ŭsich terytoryj, jakija kaliści znachodzilisia pad rasiejskim panavańniem, uklučajučy Ukrainu.

PARIE raskrytykavała patryjarcha Kiryła i nazvała Ruskuju Pravasłaŭnuju Carkvu «ideałahičnym praciaham režymu Uładzimira Pucina, jaki maje dačynieńnie da vajennych złačynstvaŭ i złačynstvaŭ suprać čałaviečnaści, jakija ździajśniajucca ad imia RF i ideałohii «ruskaha śvietu».

U zajavie skazana, što Maskoŭski patryjarchat RPC i Kirył adstojvajuć ideałohiju «ruskaha śvietu», nazyvajuć vajnu suprać Ukrainy «śviatoj vajnoj usich ruskich» i zaklikajuć pravasłaŭnych viernikaŭ achviaravać saboj dziela Rasii. «Asambleja ŭzrušanaja takim ździekam z relihii i skažeńniem chryścijanskaj pravasłaŭnaj tradycyi režymam Uładzimira Pucina i jaho staŭlenikami ŭ Maskoŭskim patryjarchacie», — skazana ŭ rezalucyi.

Parłamienckaja asambleja, jak i zajaŭlała raniej, admoviłasia pryznavać Pucina lehitymnym prezidentam RF i zaklikała krainy, jakija ŭvachodziać u Radu Jeŭropy, a taksama ŭ Jeŭrasajuz, spynić ź im lubyja kantakty. Asambleja padtrymała prapanovu Julii Navalnaj, udavy Alaksieja Navalnaha, jakaja zaklikała ŭžyć suprać «pamahatych złačynnaha režymu Uładzimira Pucina « instrumienty, raspracavanyja dla baraćby z arhanizavanaj złačynnaściu.

U svajoj zajavie PARIE zaklikała dać Ukrainie zbroju i bojeprypasy, kab jana mahła supraćstajać Rasii, a taksama ŭzmacnić sankcyi suprać Rasii, u tym liku ŭvieści abmiežavańni suprać Maskoŭskaj biržy i «Rasatama».

U PARIE zajavili, źviartajučysia da ES i krain G7, što ŭ adpaviednaści ź mižnarodnym humanitarnym pravam rasijskija naftapierapracoŭčyja zavody pavinny ličycca zakonnymi vajennymi metami.

• 40
• 0
• 4
• 1
• 1
• 0
• 2
• 0