Kryścina Cimanoŭskaja paviedamlaje, što siońnia ŭ jaje baćkoŭ Śledčy kamitet pravodzić pieratrus. Zajavu Kryściny raspaŭsiudziŭ Bajpoł.
«Pakul ja laču na spabornictvy i ŭ mianie trasucca ruki ad hetaj infarmacyi, a ŭsio tamu što ja chaču svabody dla svajoj krainy. Chaču pryjazdžać tudy na vychodnych, kab naviedvać baćkoŭ, chaču raz u hod pryjazdžać u Biełaruś dziela jaje cudoŭnaj pryrody, chaču sustrecca ź siabrami, chaču pabyvać tam dzie ja naradziłasia i vyrasła, chaču prajścisia pa Minsku, pa svaich lubimych vulicach, zajści ŭ lubimaje kafe i vypić kavy z kruasanam.
Za heta maja płata — kryminalnyja spravy, zapałochvańni i pieratrusy. U mianie zabrali dom, a ciapier dabralisia da majoj siamji, zvyčajnaj pravincyjnaj siamji, dzie tata ŭsio žyćcio pracavaŭ pažarnym, a mama supracoŭnikam banka», — paviedamlaje Cimanoŭskaja.
Jana kaža, što apošnija hady dla jaje siamji i tak byli vielmi ciažkija — rak u mamy, insult u baćki (ciapier jon invalid).
«Nichto nie niasie adkaznaść za mianie, akramia mianie samoj, i kali ŭ Śledčaha kamiteta jość pytańni da mianie, to ja zaprašaju ich u svoj novy dom na pieratrusy i razmovy», — dadaje Cimanoŭskaja.
Biahucha Kryścina Cimanoŭskaja padčas Alimpijskich hulniaŭ u Tokia ŭ 2021 hodzie raskrytykavała kiraŭnictva biełaruskaj kamandy za toje, što jaje razam ź inšymi spartoŭkami chacieli pastavić biehčy estafietu na toj dystancyi, jakuju jana nikoli nie biehała. Paśla taho jaje adchilili ad spabornictvaŭ i sprabavali vyvieźci ŭ Biełaruś, ale jana admoviłasia pakinuć Japoniju i paprasiła mižnarodnaj abarony. Jana pierajechała ŭ Polšču, atrymała hramadzianstva hetaj krainy i ciapier pradstaŭlaje jaje na mižnarodnych spabornictvach.
Ciapier Cimanoŭskaja bałatujecca ŭ Kaardynacyjnuju radu ad śpisa Alaksandra Azarava «Zakon i pravaparadak». Ułady Biełarusi raspačali kryminalnyja spravy suprać usich kandydataŭ u KR.
Byłoha treniera Kryściny Cimanoŭskaj adchilili na piać hadoŭ ad sportu za skandał na Alimpijadzie-2020
«Heta nie prosta kurortny raman ci momant pomsty». Kryścina Cimanoŭskaja pra razvod i novyja adnosiny
Cimanoŭskaja raspaviała pra nahodu dla honaru, adkaz u sacsietkach Azaronku, prafiesijnaje i asabistaje
Kamientary