Rasijski vajenkar pryznaŭ, što rasijanie pad Charkavam pierajšli da abarony
«My, napeŭna, adkryjem strašnuju tajamnicu, jakuju niazručna pryznavać va ŭra-patryjatyčnym siehmiencie», — piša Rybar.
«My, napeŭna, adkryjem strašnuju tajamnicu, jakuju niazručna pryznavać va ŭra-patryjatyčnym siehmiencie. Rasijskija vojski zamacavalisia na dasiahnutych rubiažach i častkova pierajšli da abarony, — napisaŭ papularny rasijski vajenkar Rybar, źviazany z HRU. — Ich zadača nie zahubić ludziej u šturmavych dziejańniach, a pazbavić praciŭnika inicyjatyvy i źniščyć ściahnutyja pad Charkaŭ reziervy», — tłumačyć Rybar.
Vajenkar prahnazuje, što «da kanca maja USU pavinny pierajści na poŭnač ad Charkava ŭ kontrnastupleńnie».
Rybar tłumačyć prabuksoŭvańnie rasijskich vojskaŭ niazručnaściami łandšaftu i mocnaściu ŭkrainskich pazicyj.
«Prasoŭvańnie pad Lipcami ŭskładniena tym, što sami Lipcy, Barščavaja, Ruskija i Čarkaskija Ciški (paŭnočnyja podstupy da Charkava) znachodziacca ŭ nizinie. Na paŭdniovy ŭschod ad Lipcaŭ jość vyšynia 204.7 — uzvyšša, ź jakoha adkryvajecca vid i na paŭnočnuju miažu, i pryharady Charkava. Tam abstalavany dosyć mahutny ŭkreprajon VSU, biez uziaćcia jakoha nie ŭdasca prasunucca dalej», — piša vajenkar.
Kab natchnić svaju aŭdytoryju, vajenkar HRU śćviardžaje, što nastup pad Charkavam i paniesienyja rasijskimi vojskami straty ŭsio ž mieli sens. Dziakujučy hetamu rasijskija vojski zdoleli atrymać inicyjatyvu na inšych kirunkach.
«Na hety momant pad Charkaŭ ukrainskija farmiravańni ściahnuli zvyš 50 bataljonaŭ: ich zdymajuć z usich kirunkaŭ, ahalajučy front, a taksama vyvodziać pad Charkaŭ stratehičnyja reziervy, čaho dahetul nie było, — piša jon i pryznaje. — Ale siłaŭ praciŭnika tut i praŭda šmat».
Za apošni miesiac rasijskija vojski dakłaravali viartańnie na ruiny Klaščejeŭki i Andrejeŭki pad Bachmutam, a taksama na ruiny Rabocina, Staramajorskaha i Uradžajnaha pad Zaparožžam. Jany praciahvajuć ataki na Časaŭ Jar i Krasnahoraŭku na Danieččynie.
U pajmiennym śpisie zahinułych rasiejskich vajskoŭcaŭ, sabranym u adkrytych krynicach, jaki viaduć «Miedyjazona» sumiesna ź Bi-bi-si i kamandaj vałancioraŭ, ciapier 54 185 proźviščaŭ. Pa acency Bi-bi-si, jakaja zasnavanaja na paraŭnańni danych śpisu sa źviestkami z asobnych mohiłak, realna kolkaść zabitych prykładna ŭ dva razy bolšaja. Heta značyć, što rasijskaja armija straciła ŭžo kala 110 tysiač zabitymi i sotni tysiač paranienymi.
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju12
Kamientary