«Čakaŭ ubačyć inšaje, a tut tomnaja abyjakavaść» — rasijski žurnalist pra atmaśfieru matča Biełaruś — Rasija, jaki nazvali «hulnioj hoda»
«Zdałosia, što ŭ Biełarusi ŭ pryncypie na biłbordach prasoŭvajuć tolki kazino i bukmiekierskija kantory», napisaŭ rasijski žurnalist u repartažy z hulni, što, praŭda, nie biez nalotu pabłažlivaści da «bratoŭ mienšych» u spartyŭnym i palityčnych sensach.
Rasijski žurnalist Dźmitryj Zimin naviedaŭ tavaryski futbolny matč Biełaruś — Rasija, što prajšoŭ učora na stadyjonie «Dynama» ŭ Minsku i skončyŭsia razhromam biełarusaŭ ź likam 0:4. Svaimi ŭražańniami jon padzialiŭsia ŭ repartažy na sajcie Championat.com.
Dla zbornaj Biełarusi, jakaja paśla ŭvarvańnia Rasii va Ukrainu vymušanaja pravodzić matčy na niejtralnym poli, heta była pieršaja hulnia za dva z pałovaj hady na svaim poli. Rasija, adchilenaja ad mižnarodnych spabornictvaŭ, hulaje tolki tavaryskija pajadynki, i matč ź biełarusami staŭ druhoj za dva hady hulnioj ź jeŭrapiejskim supiernikam.
«Pieršapačatkova ja čakaŭ ubačyć inšaje. Jak minimum — vialikaja rekłamnaja cikavaść da hulni. Zrazumieła, što Rasiju składana nazvać top-supiernikam, uličvajučy, što Biełaruś hulaje va ŭsich mižnarodnych turnirach. Ale jak minimum jość histaryčnaja suviaź i adsutnaść tavaryskich matčaŭ na praciahu piaci hadoŭ. Nie kažu ŭžo pra fihury Karpina [viadomy ŭ minułym futbalist, siońnia — hałoŭny trenier — NN], Alaksieja Mirančuka, Safonavaj [zorki siońniašniaj zbornaj — NN].
Adnak vynik — minimum vuličnaj rekłamy, što budzić cikavaść. Zdałosia, što ŭ Biełarusi ŭ pryncypie na biłbordach prasoŭvajuć tolki kazino i bukmiekierskija kantory. Zakony biznesu, tut biez asudžeńniaŭ.
Tak, heta nie pieraškodziła sabrać amal poŭny stadyjon. A bahatyja ludzi navat nie škadavali hrošaj, kab trapić na matč. Ź cikavaj situacyjaj sutyknuŭsia la kas: pracavała ŭsiaho para voknaŭ, nievialikija čerhi ruchalisia pavolna, zatoje pradprymalny mužčyna prapanoŭvaŭ lepšyja miescy. Za 5 tysiač rasijskich rubloŭ (180 biełaruskich) — i ledź nie ŭ luboj isnujučaj valucie. Tyja, kamu było lanota stajać pa paŭhadziny, zdavalisia i kuplali. Choć zvyčajnyja kaštavali ŭ dva-try razy tańniej. Jak kažuć tut: biznes pa-biełarusku.
Ale krychu bolš sumnaja karcinka ŭnutry. Tam čakaŭ ubačyć kuču ludziej u miascovaj atrybutycy ci chacia b sa ściahami, jakija viesialacca, śpiavajuć pieśni i źbirajucca padtrymlivać svaju kamandu. Moža, takoje čakaješ pahladzieć u luboj krainie, kudy pryjazdžaješ u hości. Ale zamiest hetaha — niejkaja tomnaja abyjakavaść. Na ludziej u futbołkach zbornaj abo sa ściahami nakidvalisia z kamierami jak na niejki rarytet.
Padałosia, što zaŭziataraŭ u futbołkach kłubaŭ rasijskaj premjer-lihi było navat bolš, čym tych, chto ŭ hety dzień vyrašyŭ identyfikavać siabie ź Biełaruśsiu nie tolki ŭ dušy, ale i ŭ adzieńni. Choć pierad pačatkam matču źjaviŭsia siužet niby z 2000-ch: na arenu amal strojem zajšli mužčyny ŭ vajskovaj formie, nadzieli na siabie švedry ź biełaruskaj ajdentykaj i adpravilisia na trybuny. Balelščyki, pa jakich my zasumavali.
Jašče pierad hulnioj ja zajšoŭ u kamientary i ŭbačyŭ paradaksalnuju pierapisku. Chtości spytaŭ: dzie možna kupić formu zbornaj? Adkaz: nidzie ci nie viedajem. … Naohuł, paradoksaŭ chapała. Naprykład, u rajonie stadyjona za try hadziny da pačatku matča pačali abmiažoŭvać prodaž ałkaholu. Zatoje na samim stadyjonie, kali łaska. Piva karystałasia vialikim popytam. Ale ŭsio kulturna — ułasna, inakš i nie mahło być.
Jašče adzin dziŭny fakt. Prosta ŭ budynku stadyjona pracuje roznaha rodu biznes: poŭnafarmatny bar unizie, kudy možna trapić, navat kali ŭ ciabie niama bileta, sałon pryhažości — tudy, vierahodna, taksama. Ale pry hetym da 20:00 byŭ začynieny ledź nie adziny mahazin, dzie možna kupić mierč. Taksama, mabyć, biznes pa-biełarusku.
Pry hetym minułaje zavablivała. Ździviŭsia, nakolki ŭ Biełarusi kaštoŭnaja nastalhija. I jaje navat sprabujuć pieradavać nastupnym pakaleńniam. Voś razmova ŭ čarzie na aŭtohraf da Bilaletdzinava, Aleničava, Citova [zorki pačatku 2000-ch — NN].
— Hladzi, heta lehiendy zbornaj Rasii. Raniej bačyŭ ich tolki pa televizary, — z honaram skazaŭ mužčyna svajmu maleńkamu synu.
Toj kinuŭ pozirk, adviarnuŭsia i praciahnuŭ jeści maroziva. Emocyi baćki, jaki stajaŭ u čarzie na śpiakocie, jaho asabliva nie cikavili. Choć, zdavałasia, heta jak raz toje, što mahło. Znoŭ ža, pytańnie da arhanizataraŭ.
Na 20-tysiačny stadyjon — usiaho niekalki zabaŭlalnych zon. I tam albo pradajuć futbołki, albo piva z burhiery, albo fotkajucca. Okiej, jašče adna zona z udarami pa miačy ŭ impravizavany darts. Naŭrad ci heta ŭrazić bolšaść.
A zaraz dadajcie da ŭsiaho hetaha tuju samuju adsutnaść mižnarodnych matčaŭ u Minsku. Biełaruś hulaje dzie zaŭhodna, ale nie ŭ siabie doma. Takija ŭmovy UEFA pa dopusku. A jašče kamanda paśla prychodu novaha treniera mocna abnaviłasia. Tyja, z kim razmaŭlaŭ, ščyra pryznavalisia, što navat nie viedajuć bolšaść hulcoŭ zbornaj, jakaja ŭ niejki momant mieła tearetyčnyja šancy vyjści na Jeŭra-2024.
A ŭ pieramozie Rasii nad takim supiernikam niama ničoha hieraičnaha. Biełaruś, niahledziačy na dobry šaniec i mahčymaści da prahresu, chutčej topčacca na miescy. Ale pytańni moža zadavać tolki sama sabie.
Ciapier čytajuć
Za niekalki dzion da vyzvaleńnia na palitźniavolenuju Kulšu zaviali novuju kryminalnuju spravu — čaćviorty raz4
Kamientary