Bałkuniec zaklikaje zryvać vybarčyja płakaty. Ale za heta mohuć sadžać

Pierad vybarami prapanujucca roznyja idei nakont taho, jak pravilna dziejničać biełarusam. Časam hetyja idei ekzatyčnyja, časam dalokija ad realnaści, ale byvaje, što niasuć vidavočnuju niebiaśpieku.

Ananimny «Abjadnany štat supracivu» (AŠS), za jakim, mierkavana, staić apazicyjny dziejač Andrej Abozaŭ, z Estonii raić biełarusam… zmahacca z vybarčymi płakatami. Tak, heta nie žart. Prapanujecca chadzić pa horadzie i ciškom zryvać papiarovuju ahitacyju.

«Kali vy bačycie płakat u padtrymku vybaraŭ, … kali pierad vami visić lubaja drukavanaja pradukcyja ŭ padtrymku A. Łukašenki ci adnaho ź jahonych padstaŭnych kandydataŭ, to vaša zadača zaklučajecca ŭ tym, kab ničoha nie visieła. … Zryvajcie ci psujcie płakaty z zaklikami hałasavać za A. Łukašenku! … Sapsavany pieradvybarčy płakat — heta demanstracyja biaśsilla ŭładaŭ, prykmieta ich marhinalnaści i taho, što narod hrebuje A. Łukašenkam», — havorycca ŭ jaho instrukcyi.

Tak, robicca adsyłka da taho, što pry hetym treba dumać pra svaju biaśpieku. Ale ŭ krainie, dzie ŭstalavana bolš za 40 tysiač milicejskich videakamier, heta niasie vialikuju niebiaśpieku.

Palityk Dźmitryj Bałkuniec vitaje płan, apublikavany AŠS.

«Dobraja inicyjatyva. Zryvajcie lubyja pieradvybarčyja płakaty. Kali bačycie, što niechta ich rasklejvaje ci raznosić ulotki, vyklikajcie milicyju», — zaklikaje palitołah z Varšavy.

Bałkuniec mała taho, što prapanuje zryvać płakaty, dyk jašče raić apazicyjna nastrojenym biełarusam telefanavać u milicyju.

Jak pakazvaje praktyka, u ciapierašniaj Biełarusi padobnaja sprava moža skončycca nie tolki sutkami, ale i turemnym prysudam.

Michaił Chamicevič, Mikałaj Karobka, Viačasłaŭ Daškievič i Taćciana Zajac. Heta imiony čatyroch palitviaźniaŭ, jakija atrymali realnyja terminy za toje, što pierad refierendumam-2022 rassyłali listy siabram vybarčych kamisij z zaklikam ličyć hałasy sumleńnia. Im prysudzili ad dvuch da dvuch z pałovaj hadoŭ kałonii. Apošni ź ich vyzvaliŭsia paŭhoda tamu.

Admietna, što na ŭlotcy, jakuju jany adpraŭlali pa pošcie, było napisana «Abjadnańnie arhanizacyj Supraciŭ». Niezrazumieła, ci heta toj samy Supraciŭ, ci inšy, ale historyja skončyłasia aryštami, bo ludzi trapili na kamiery nazirańnia na «Biełpošcie».

Siłaviki interpretavali ich dziejańni jak «pieraškodu ažyćciaŭleńniu vybarčych pravoŭ». Pa hetym kryminalnym artykule moža pahražać da 3 hadoŭ kałonii, a kali hrupaj asobaŭ — to až da 5 hadoŭ. Ni za što, ale heta realii ciapierašniaj Biełarusi, dzie zakony traktujucca advolna.

Kali ŭ 2022 hodzie niechta z arhanizataraŭ akcyi moh i nie praličyć nastupstvy, to ŭ 2024 hodzie ŭroki pavinny być vyvučanyja. Ci varta padstaŭlać ludziej dziela pary sarvanych płakataŭ?

Nastupać na tyja samyja hrabli moža ci durań, ci pravakatar.

• 5
• 1
• 5
• 23
• 1
• 0
• 5
• 0