«Davajcie damaŭlacca». Ci pojdzie Tramp na ździełku z Maduram, raz cisk vyniku nie mieŭ?
Uznaŭlajučy ŭzajemadziejańnie z Maduram, my ničoha nie hublajem. Zatoje atrymlivajem šaniec źmiakčyć mihracyjny kryzis — pryblizna tak razvažajuć upłyvovyja ludzi ŭ atačeńni Trampa.
Vieniesueła — najbahaciejšaja kraina ŭ śviecie ŭ płanie naftavych resursaŭ. Pa stanie na 2024 hod, zapasy nafty ŭ hetaj krainie aceńvajucca na bolš za 300 miljardaŭ barelaŭ. Heta amal u čatyry razy bolš, čym u Rasii, i ŭ piać z pałovaj razoŭ bolš, čym u ZŠA.
U toj ža čas heta kraina zajmaje druhoje miesca pa biednaści ŭ rehijonie Łacinskaj Amieryki i Karybskaha basiejna.
Vosiem ź dziesiaci čałaviek žyvuć u biednaści, pryčym siem ź ich — u krajniaj biednaści. Ciaham apošniaj dekady krainu pakinuła amal vosiem miljonaŭ čałaviek.
Usio heta — vynik 25 hadoŭ kiravańnia levych papulistaŭ Uha Čaviesa i jaho nastupnika Nikałasa Madury. Chraničnaja karupcyja, ekanamičny dyletantyzm i dyktatura dali voś taki vynik.
«Palityka maksimalnaha cisku tolki ŭmacavała Maduru»
U časy svajho pieršaha prezidenctva ŭ 2017—2021 Donald Tramp vyznačaŭsia žorstkaj palitykaj u dačynieńni da Madury i jahonaj kliki. Padsumoŭvajučy hetu palityku, vydańnie Foreign Policy ŭ červieni 2021 pisała tak: «Palityka «maksimalnaha cisku» Trampa tolki ŭmacavała Maduru. Ciapier [novy prezident Džo] Bajden pavinien vybrać novy kurs».
Vybirańnie novaha kursu ŭ časy Bajdena źviałosia da epizadyčnych sprobaŭ padšturchnuć Madura da dyjałohu z apazicyjaj uzamien za pastupovaje pasłableńnie sankcyjaŭ.
Paśla taho, jak Tramp znoŭ vyjhraŭ vybary, a Madura svaje vybary znoŭ sfalšavaŭ, uznavilisia razmovy pra nieabchodnaść pierahledzieć palityku adnosna Vieniesueły — piša The Wall Street Journal. Pryčym pierahledzieć u typova biznesovym klučy: prahmatyčna i bieź lišnich santymientaŭ.
Davajcie damaŭlacca z Maduram
Hary Sardžant III, miljarder i donar Respublikanskaj partyi, razvažaje nastupnym čynam. Ad sankcyjaŭ na vieniesuelskuju naftu nie vyjhrajém ni my, ni Madura. Uznaŭlajučy ŭzajemadziejańnie z Maduram i pasłablajučy sankcyi, my ničoha nie hublajem, zatoje atrymlivajem šaniec źmiakčyć mihracyjny kryzis.
Adno ź sioletnich apytańniaŭ pakazała, što kali Madura zastaniecca pry ŭładzie, to 19% vieniesuelcaŭ hatovy emihravać nieadkładna. Ažno 48% chočuć zrabić heta na praciahu adnaho da šaści miesiacaŭ. Asnoŭny napramak mihracyi — kaniečnie ž, ZŠA.
Pakolki nie možam źvierhnuć aŭtakrata — davajcie ź im damaŭlacca. Bo niešta ž treba rabić — novyja chvali emihracyi ŭžo na haryzoncie — pryblizna tak hučyć pasył biznesoŭcaŭ a-la Hary Sardžant.
Aproč taho — kažuć jany — adnaŭlajučy ekanamičnyja suviazi ź Vieniesuełaj, ZŠA mohuć viarnuć sabie ŭpłyŭ u naftavaj pramysłovaści Vieniesueły i pamienšyć stratehičnyja pieravahi, jakimi zaraz karystajucca hieapalityčnyja kankurenty — Rasija i Kitaj.
Madura — dźviuma rukami «za». Tramp — naŭrad ci
Vieniesuelski aŭtakrat nie raz zajaŭlaŭ pra hatoŭnaść pierazahruzić adnosiny z Vašynhtonam, akcentujučy mienavita «biasprojhryšnaść» mahčymaj ździełki.
Ci jość šaniec, što Tramp dyjamietralna źmienić svaju palityku adnosna Vieniesueły?
Što ž, u pieradvybarnaj kampanii jon nie raz zhadvaŭ pra Karakas (stalicu Vieniesueły) jak pra «całkam spakojnaje miesca». Kazaŭ navat, što pierajedzie tudy, kali prajhraje na vybarach u ZŠA — nahadvaje Wall Street Journal.
Hetyja vykazvańni, adnak, bolš padobnyja da ironii. A kali surjozna, to bolš krasamoŭnym u hetym płanie jość fakt, što Tramp pryznačyŭ dziaržsakratarom sienatara Marka Rubia — čałavieka, jaki viadomy svajoj padtrymkaj surovych zachadaŭ suprać Madura i inšych aŭtakrataŭ rehijona.
U kamandzie Trampa buduć inšyja praciŭniki Madury — zaŭvažaje WSJ. Naprykład, były daradca pa nacyjanalnaj biaśpiecy Maŭrysia Kłavier-Karonie i Iłan Mask.
Hety apošni navat zaprapanavaŭ Maduru dvuboj sa ździeklivaj umovaj: kali ŭ bojcy pieramoža jon, to Madura pakinie ŭładu ŭ Vieniesuele, a kali pieramoža Madura, to Mask padoryć palityku biaspłatny bilet na Mars.
Niepryjaź da Madury nadalej mocnaja ŭ kołach respublikancaŭ. Niekatoryja, jak Eryk Pryns, prapanujuć navat pavialičyć uznaharodu za aryšt Madura z 15 da 100 miljonaŭ dołaraŭ.
Mierkavańni typu taho, što ahučvaje Hary Sardžanta III, adlustroŭvajuć adzin z trendaŭ u amierykanskaj palitycy. Hetyja mierkavańni majuć svaje kozyry i patencyjał dla pašyreńnia.
Ale na siońnia jany chutčej indykatary nastrojaŭ, čym realnaja siła, zdolnaja źmianić kurs.
Kamientary
A Mask časam u chakiej nie hulaje? Jeść adzin kandydat na dvuboj.