«Strelić z razabranaha pistaleta niemahčyma». Belpol acaniŭ viersiju pra hibiel milicyjanieraŭ u Viciebsku padčas čystki zbroi

Čystka zbroi zvyčajna pravodzicca biez bojeprypasaŭ

«Čystka zbroi, jak praviła, robicca paśla jaje prymianieńnia albo vykarystańnia. Na praktycy ž zbroju čyściać čaściej za ŭsio paśla vučebnych strelbaŭ. Adnak dla ŭdziełu ŭ strelbach zbroja vydajecca biez bojeprypasaŭ. Na strelbach bojeprypasy vydaje kiraŭnik strelbaŭ na punkcie bajavoha siłkavańnia niepasredna pierad vychadam na ahniavy rubiež. Paśla praviadzieńnia strełaŭ i dakładzie ab zakančeńni stralby padajecca kamanda: «Zbroja da ahladu», i zbroja ahladajecca kiraŭnikom strelbaŭ na najaŭnaść patrona ŭ patrońniku», — raskazali ŭ Belpol.

Tam vyklučyli mahčymaść taho, što paśla strelbaŭ u pistalecie supracoŭnika vypadkova zastaŭsia patron, jakim moh być zrobleny vypadkovy streł.

Časam čystka zbroi robicca centralizavana ŭ śviatle budučaj pravierki abo pa kapryzie načalnika, ale i ŭ hetym vypadku zbroja znoŭ ža vydajecca dla pracedury biez bojeprypasaŭ, dadali ŭ arhanizacyi.

Čystka zbroi prachodzić u śpiecyjalizavanych pamiaškańniach

U Belpol padkreślili, što čystka tabielnych pistaletaŭ robicca ŭ pakoi pryjomu/zdačy zbroi ŭ pamiaškańni apieratyŭna-dziažurnaj słužby. Heta abumoŭlena jak patrabavańniami instrukcyj, tak i banalnaj zručnaściu — mienavita ŭ hetym pamiaškańni znachodziacca anučki dla čystki i aliva dla zmazvańnia.

«Aliva dla zbroi i vykarystanyja anučki majuć ustojlivy, rezki niepryjemny pach, tamu supracoŭniki nie zachoŭvajuć ich u svaich kabinietach. Akramia taho, pakoi pryjomu/zdačy zbroi skanstrujavanyja takim čynam, što pa pierymietry ścien na ŭzroŭni hrudziej raźmieščanyja naviasnyja palicy, jakija vykarystoŭvajucca ŭ tym liku jakraz dla čystki zbroi», — adznačajuć byłyja siłaviki.

Takim čynam, usie manipulacyi sa zbrojaj supracoŭnik pravodzić stojačy tvaram da ściany — heta praviła ŭviedziena mienavita dla taho, kab vyklučyć streł u kalehaŭ, jakija znachodziacca ŭ pamiaškańni.

Zbroju dla čystki raźbirajuć častkova

Najbolš važnaj detallu Belpol nazyvaje toje, što čystka zbroi robicca pry poŭnaj albo častkovaj razborcy pistaleta. Mienavita častkovuju razborku vykarystoŭvaje pieravažnaja bolšaść supracoŭnikaŭ, pakolki technikaj poŭnaj vałodajuć ličanyja adzinki.

«Pry vykanańni častkovaj razborki pa paradku vykonvajucca nastupnyja dziejańni: ź pistaletnaj rukajatki dastajecca mahazin (mienavita ŭ im znachodziacca patrony), paśla čaho vyklučajecca zaścierahalnik i z metaj pravierki na najaŭnaść patrona ŭ patrońniku zatvor advodzicca ŭ zadniaje stanovišča, dalej ad ramy adździalajecca zatvor i sa stvała zdymajecca zvarotnaja spružyna», — apisali praces u arhanizacyi.

Tam padkreślili, što zrabić streł z razabranaha pistaleta niemahčyma.

«Navat kali dapuścić mizernuju vierahodnaść taho, što streł adbyŭsia mižvolna pry adździaleńni zatvora ad ramy, dla ździajśnieńnia nastupnaha suicydu supracoŭniku, jaki znachodzicca ŭ stanie žudasnaha stresu, nieabchodna było b spačatku nazad sabrać pistalet, što vyhladaje vielmi małavierahodnym», — adznačajuć u Belpol.

Takim čynam, miarkujuć u arhanizacyi, viersija pra hibiel milicyjanieraŭ u vyniku niaščasnaha vypadku pry čystcy zbroi niežyćciazdolnaja. Zamiest hetaha Belpol ličyć, što pryčynaj hibieli mahła stać złačynnaja chałatnaść pry abychodžańni sa zbrojaj albo naŭmysnaje supraćpraŭnaje pazbaŭleńnie žyćcia inšaha čałavieka z nastupnym suicydam.

Zdareńnie adbyłosia 9 studzienia ŭ adnym z adździaleńniaŭ milicyi ŭ Viciebsku. Adzin z supracoŭnikaŭ milicyi, pavodle adnoj ź viersij, čyściŭ pistalet i vypadkova streliŭ u kalehu, toj zahinuŭ na miescy.

Ubačyŭšy, što jon narabiŭ, milicyjant, jaki čyściŭ pistalet, zastreliŭsia. Zahinułym było kala 20 hadoŭ.

• 17
• 0
• 1
• 4
• 4
• 0
• 1
• 0