Vydaviectva Skaryna Press razam ź inicyjatyvaj «33 knihi dla inšaj Biełarusi» padrychtavała da publikacyi novy raman Źmitra Višniova «Ja — toje miasa, jakoje pryhatavaŭ Źmicier» i adkryła pieradzamovu, paviedamlaje Bellit.info.
«Raman byŭ dapisany jašče letaś u Bierlinie, ale ja praciahvaŭ zajmacca jahonaj redakturaj i sioleta. U im ja razrezaŭ siabie nie škadujučy, kab možna było pabačyć majo serca, jakoje pulsuje. Vielmi spadziajusia, što hetaja kniha nie pakinie vas u spakoi», — dzielicca navinoj u sacsietkach Źmicier Višnioŭ i dziakuje siarod inšaha Irynie Hierasimovič i Hiote-Instytutu.
U anatacyi havorycca, što novy tvor Źmitra Višniova — heta raman-łabirynt, jaki nahadvaje adnačasova padarožža Dante ŭ piekła, płavańnie Adysieja dadomu i kampjutarnuju hulniu-błukałku, u dzie treba adšukać vyjście i vyžyć. Sustrečy z pamierłymi siabrami i viadomymi asobami: Ułdysam Berzińšam i Alesiem Rodzinym, Andrejem Bitavym i Edvardam Munkam, Jankam Brylom i Džejmsam Džojsam — šlach hieroja ŭ zahadkavaj kapsule času budzie pakručastym, jamu daviadziecca sutyknucca z ułasnymi strachami i spaznać samoha siabie.
Źmicier Višnioŭ — paet, prazaik i mastak i vydaviec. Adzin z suzasnavalnikaŭ lehiendarnaha mastackaha ruchu «Bum-Bam-Lit», jaki ŭ 1990-ja hady prahnuŭ razarvać miežy litaratury i imknuŭsia da sintezu mastactvaŭ.
Aŭtar knih «Štabkavy tamtam» (1998), «Tamburny maskit» (2001), «Trap dla suślika, albo nekrafeličnaje daśledavańnie adnaho vidu hryzunoŭ» (2002), «Vieryfikacyja naradžeńnia» (2005), «Faraon u zaaparku» (2007), «Zamak, pabudavany z krapivy»(2010), «Šorhat žukoŭ» (2011), «Śpityja barkasy» (2014), «Kali pryhledziecca — Mars sini» (2018). U 2014 hodzie raman Das Brennessekhaus vyjšaŭ pa-niamiecku.
Taksama zajmajecca žyvapisam.
U 2007 hodzie razam ź Michasiom Bašuram Źmicier Višnioŭ stvaryŭ vydaviectva «Halijafy», jakoje pieradusim vydavała biełaruskamoŭnuju litaraturu i nadavała asablivuju ŭvahu debiutnym i zabytym tvoram minułaha stahodździa. Vydaviectva i kniharnia praisnavali da 2022 hoda.
Ciapier žyvie ŭ Hiermanii.
Ciapier čytajuć
Pamiatajecie Piatrušu, jaki vydziraŭ pravady «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja10
Kamientary