Paśla deficytu bulby i kapusty ŭłady sprabujuć nie dapuścić kałapsu z ahurkami — u niekatorych haradach nie chapaje
Niadaŭna biełarusy sutyknulisia z deficytam bulby, kapusty i cybuli. Kab znajści prostuju harodninu, prychodziłasia mocna pastaracca. Ciapier u niekatorych haradach nazirajucca taksama prablemy z pastaŭkaj ahurkoŭ.
U pryvatnaści, z hetym sutyknulisia žychary Horak, Baranavič, Krasnapolla i Kobryna.
U Horkach, kab vyrašyć prablemu ź niedachopam ahurkoŭ u kramach, pryjšłosia padniać na vušy čynoŭnikaŭ: naprykład, načalnicu ŭpraŭleńnia ekanomiki rajvykankama Irynu Kancavuju i pradstaŭnikoŭ rajspažyŭtavarystva. Pryčyna deficytu — «pieraboi z pastaŭkami na składach».
«Niahledziačy na časovyja ciažkaści z dastaŭkaj ahurkoŭ u Horkach, dziakujučy supolnaj pracy rajonnaj ułady i handlovych abjektaŭ situacyja pastupova palapšajecca», — adrapartavali ŭ miascovaj presie.
Niedachop ahurkoŭ Ministerstva antymanapolnaha rehulavańnia i handlu prahnazavała jašče ŭ pačatku miesiaca: pra heta stała viadoma ź niepubličnaha lista ŭ Minsielhascharč, jaki «Biełpoł» pieradaŭ «Lusterku».
U dakumiencie siarod pryčyn pieraboju nazyvajecca nievykanańnie vytvorcami płanaŭ pa abjomach pradukcyi dla ŭnutranaha rynku, a taksama źmiena cykła ich vyroščvańnia pad kaniec sakavika.
Naprykład, jak śćviardžajuć u struktury, «Jeŭrahandal» atrymaŭ mienš za pałovu ad taho abjomu, pra jaki zahadzia damoviŭsia z pastaŭščykami. A ŭ «Dabranoma» prablemy z atrymańniem praduktu jašče z 23 sakavika.
Čytajcie taksama: Hniłoje, zatoje niadoraha. Jak papuliscki ŭkaz Łukašenki ab abmiežavańni nacenki ŭpłyvaje na ŭsich udzielnikaŭ łancužka pastavak harodniny
Pry hetym jašče ŭ lutym na fonie padaražeńnia impartnych ahurkoŭ u kramach ministr antymanapolnaha rehulavańnia i handlu Alaksiej Bahdanaŭ zapeŭnivaŭ, što ŭ sakaviku biełarusy buduć całkam zabiaśpiečanyja svaimi ahurkami.
Amal tady ž namieśnik ministra sielskaj haspadarki i charčavańnia Uładzimir Hrakun spravazdačyŭsia, što, kab zabiaśpiečyć biełarusaŭ harodninaj u mižsiezońnie, u krainie raspracavali stratehiju raźvićcia ciapličnaha harodnictva na 2023—2027 hady: «Ahułam u stratehiju ŭvajšli 10 ciapličnych kambinataŭ. Jany praviali madernizacyju na 23 ha, što nam dazvoliła ŭ 2023 hodzie ŭžo na 100% zabiaśpiečyć patrebu ajčynnym ahurkom».
Što tyčycca cen, to ciapier jany kudy mienš šakujučyja, čym zimoj: tady cana na impartnyja ahurki dasiahała 12-16 rubloŭ za kiłahram, za biełaruskija prasili ad vaśmi rubloŭ.
Ciapier u anłajn-dastaŭkach možna zamović jak hładkija, tak i kalučyja biełaruskija hurki pa 6-7 rubloŭ za kiłahram.
Kali ž chočacca jašče tańniej, treba iści na rynak. Tak, na Kamaroŭcy ŭ subotu, 26 krasavika, u niekatorych pradaŭcoŭ ź siezonnaha rynku ŭžo byli zaŭvažanyja ahurki pa 3-4 rubli za kiło.
Ni bulby, ni kapusty. U mnohich kramach źnikła harodnina, na bazarach ceny zaškalvajuć
Deficyt harodniny: śledam za kapustaj z kramaŭ prapała cybula
Hniłoje, zatoje niadoraha. Jak papuliscki ŭkaz Łukašenki ab abmiežavańni nacenki ŭpłyvaje na ŭsich udzielnikaŭ łancužka pastavak harodniny
U śviecie deficyt fistašak — usio praz modny desiert
Kamientary
Ciapier ješcie z banak.