Syn supracoŭnika biełaruskaha KDB vierbavaŭ u Polščy ludziej dla napadu na rasijskich apazicyjanieraŭ
Biźniesmien ź Biełarusi Viktar P. byŭ pasiarednikam pry viarboŭcy ludziej, jakija napadali na rasijskich apazicyjanieraŭ u niekalkich krainach śvietu. Jahony baćka — supracoŭnik biełaruskaha KDB, paviedamlaje Most sa spasyłkaj na Rzeczpospolita.
Pra Viktara P. stała viadoma padčas rasśledavańnia napadu na rasijskaha apazicyjaniera Leanida Vołkava. U sakaviku 2024 hoda jon byŭ źbity małatkom kala svajho doma ŭ Vilni. Adnak byli i inšyja napady na ludziej, źviazanych z Fondam baraćby z karupcyjaj, zasnavanym Alaksiejem Navalnym. Ich vykanaŭcaŭ taksama vierbavali ŭ Polščy. U červieni 2023 hoda ŭ Ženievie złamyśniki zakidali jajkami Ivana Ždanava, blizkaha paplečnika Navalnaha. U vieraśni 2023 hoda ŭ Buenas-Ajresie nieviadomy ŭdaryŭ žonku ekanamista Maksima Mironava.
U Polščy rasśledavańnie napadaŭ viadzie prakuratura sumiesna z Ahienctvam unutranaj biaśpieki. Padazravanymi pa spravie prachodziać 11 čałaviek, u tym liku hramadzianin Biełarusi Viktar P., jaki pražyvaje ŭ Polščy, i hramadzianin Rasii Anatol B. Śledstva ŭstanaviła, što rasijanin zakazvaŭ i apłačvaŭ napady, a biełarus vierbavaŭ vykanaŭcaŭ — hramadzian Polščy z kryminalnym minułym. Taksama jon vykonvaŭ rolu pasiarednika pamiž zakazčykam i vykanaŭcami.
Pavodle danych vydańnia Rzeczpospolita, Viktar P. — syn supracoŭnika biełaruskaha KDB. Jon lehalna pražyvaje ŭ Polščy. Raniej ŚMI pisali, što polskija pravaachoŭniki vystaŭlali Viktaru P. abvinavačańnie ŭ machinacyi ź viartańniem PDV. Biełaruski biźniesmien paznajomiŭsia z Anatolem B. u adnym z kazino.
Ź vieraśnia 2024 hoda Anatol B. znachodzicca pad vartaj, Viktar P. i inšyja fihuranty spravy — na voli.
Ciapier čytajuć
Labiedźka pra syna-palitviaźnia: Heta nie bravada, ja hatovy abmianiać siabie na jaho10
Kamientary