Tamaty ad 3 rubloŭ, ahurki tańniejšyja za bulbu. Što pradajecca na Kamaroŭcy ŭ vychodnyja
Niahledziačy na drennaje nadvorje i skarhi fiermieraŭ, siezonnaja harodnina na Kamaroŭcy praciahvaje padać u canie i časam kaštuje navat mienš, čym maładaja bulba. Pastupova apuskajecca i ceńnik na jahady. Čym vyhadna zakuplacca na rynku ŭ hetyja vychadnyja, pišuć Minsk-naviny.
Leta, chaj sabie i daždžlivaje, u samym razhary, i asartymient rynku praciahvaje papaŭniacca. Z apošnich siezonnych navinak možna adznačyć zialonuju sparžavuju fasolu: jaje pakul što mała, tamu ceńnik trymajecca na ŭzroŭni 15 rubloŭ.
Pačatki cukrovaj kukuruzy ŭžo možna nabyć na mnohich miescach, ich košt vahajecca ad 5,90 da 7 rubloŭ za kiłahram.
Biełakačannaja kapusta vystaŭlena pa 2 rubli, prajs na kvietkavuju i brokali pačynajecca z 2,50 rubla.
Ahurki možna kupić ad 2,50 rubla, pamidory — ad 3 rubloŭ. Za kiłahram krasnadarskich pamidoraŭ-ślivak treba zapłacić usiaho 4,50, na rubiel daražej možna znajści čery — dla ich heta kazačnaja cana, bo čaściej za ŭsio jany vystaŭleny pa 12—18 rubloŭ.
Asarci z žoŭtych, karyčnievych i malinavych — pa 8,50 rubla. Bałharski pierac — ad 6,50, rannija buraki i morkva ad fiermieraŭ — pa 3—5 rubloŭ. Kiło kabačkoŭ abydziecca ŭsiaho ŭ 1,50 rubla.
Maładoj biełaruskaj bulby šmat, ale ceny na jaje trymajucca. Tańniej za 2,50 rubla vy naŭrad ci znojdziecie, siaredni prajs pa rynku — 3‑4 rubli. Na adnym z pryłaŭkaŭ, vydzielenych dla handlu fizičnymi asobami, napeŭna, samy dobry asartymient na Kamaroŭcy — bolš dziasiatka rańnich i siarednie-rańnich sartoŭ, u tym liku papularnyja «skarb», «paroli» i «viektar». Samuju tannuju «adretu» važać pa 2,50 rubla, «karalevu Hannu», «pieršaćviet» i «bajarskuju» — pa 4,50 rubla.
— Heta biełaruskaja bulba, nie impartnaja — vy nie dumajcie. Vyroščvajem u Samachvałavičach, dzie znachodzicca Instytut bulbavodstva, tamu i taki vialiki vybar. Ja vyroščvaju šeść, astatnija — pradukcyja majho stryječnaha brata. Ale vy bačycie — čarha da nas nie staić, — apovied fiermiera tut ža pieraryvaje pakupnica, jakaja prosić uzvažyć dva kiłahramy «skarbu».
Na rynak užo zavieźli pieršyja jabłyki novaha ŭradžaju. Nievialikija ćviordyja płady z Uźbiekistana kaštujuć 4,50 rubla, tady jak minułahodnija ŭsio jašče pradajuć pa 7,50 rubla. Uźbiekskija ślivy — i taho mienš — 3,90 rubla. Pa 4,90 rubla možna ŭziać kiło drobnych niektarynaŭ, niedarahija piersiki — na rubiel-dva daražejšyja. Azierbajdžanskija dyni i kavuny — pa 5,90 rubla.
Pik prodažaŭ čarešni pastupova pierachodzić, choć sałodkich jahad jašče dastatkova, a ceny pačynajucca ad 13 rubloŭ. Zatoje siezon biełaruskich durnicaŭ u samym razhary, i jahady na hałoŭny rynak stalicy viazuć z usich biełaruskich rehijonaŭ.
Prajs na durnicy pačynajecca ad 16 rubloŭ. Jahady papularnych sartoŭ «djuk» i «blukrop» vyciaśniaje «patryjot» — rajaniravany ŭ Biełarusi sort, jaki zaraz nabiraje papularnaść.
Parečki ŭ paŭlitrovych šklankach — pa 6 rubloŭ, ahrest — pa 7 rubloŭ, maliny — pa 10 rubloŭ. Jahady vyhadniej brać kiłahramami: parečki — pa 13, čarnicy i ahrest — pa 20 rubloŭ. Višniu pradajuć pa 10 rubloŭ zvyčajnuju i pa 15 rubloŭ španku.
Na Kamaroŭcy trochi patańnieli raznastajnyja sałaty i zielanina. Ramen, fryze, maślaničny, łoła rosa, ramana i pak-čoj pa 10—15 rubloŭ za kiło. Pučki duchmianaj rukały i kinzy — pa 2 rubli za 100 h, špinat, krop, manhold i piatruška — pa 1,50 rubla. Stolki ž pryjdziecca zapłacić za liście kiejła. Zialonaja cybula tańniejšaja — pa 80 kapiejek.
Ciapier čytajuć
Bankaŭskija insajdary ličać novyja sankcyi suprać čatyroch biełaruskich bankaŭ małaznačnymi. I voś čamu
Kamientary