U Biełaruś z Rasii ekstradavali žančynu, jakaja machlaryła pad prykryćciom turystyčnaha biznesu
U Minsku pierad sudom paŭstanie biźniesvumien, jakuju abvinavačvajuć u bujnym machlarstvie. Pavodle danych Śledčaha kamiteta, machlarstva adbyvałasia na praciahu niekalkich hadoŭ i pryviało da naniasieńnia padmanutym škody bolš čym na 170 tysiač rubloŭ.
Žančyna ź Minska, jakoj ciapier 48 hadoŭ, jašče ŭ 2013 hodzie zasnavała turystyčnuju kampaniju, jakaja spačatku pracavała paśpiachova. Klijenty byli zadavolenyja, a biznes aktyŭna raźvivaŭsia. Ale z 2019 hoda situacyja źmianiłasia: zamiest abiacanaha adpačynku ludzi sutykalisia z dadatkovymi vydatkami — nibyta raptoŭnymi zborami, pieradapłatami i inšymi prablemami, jakija ŭźnikali pierad samym vyletam.
Akramia taho, uładalnica firmy pačała brać u žycharoŭ Minska pazyki na patreby biznesu, ale viartać hrošy nie śpiašałasia. U vyniku ŭźnikli vialikija daŭhi i dziasiatki aburanych klijentaŭ. U 2021 hodzie 48 čałaviek źviarnulisia ŭ milicyju. Była zaviedzienaja kryminalnaja sprava pa fakcie machlarstva ŭ asabliva bujnym pamiery.
Žančyna ŭciakła z krainy i na praciahu amal troch hadoŭ chavałasia ŭ Rasii. Ale ŭ 2024 hodzie jaje znajšli, a ŭ 2025-m ekstradavali nazad u Biełaruś. Padčas śledstva jana admoviłasia davać pakazańni, ale śledčyja i tak sabrali dastatkova dokazaŭ jaje viny.
Žančynie vystavili abvinavačańnie pavodle č. 4 art. 209 Kryminalnaha kodeksa Biełarusi (machlarstva ŭ asabliva bujnym pamiery). Ciapier jana znachodzicca pad vartaj i čakaje sudovaha rašeńnia.
Suśvietnaja zorka Džejsan Deruła zajechaŭ u Biełaruś. Premjer Turčyn vadziŭ jaho pa Domie ŭrada8
Kamientary