Va ŭkrainski pałon trapiŭ 58-hadovy biełarus, što vajavaŭ na baku Rasii
Jon napiŭsia i pajšoŭ u vajenkamat, u toj ža dzień jaho pryzvali.
Va ŭkrainski pałon trapiŭ jašče adzin hramadzianin Biełarusi — 58-hadovy Vadzim Zajkoŭski z Homiela, jaki padpisaŭ kantrakt z rasijskaj armijaj i vajavaŭ u 245-m hvardziejskim motastrałkovym pałku, piša Radyjo Svaboda.
«Ja pryjechaŭ u Rasijskuju Fiederacyju, horad Rastoŭ. Pačali my… zrabili pracu, źjavilisia kapiejki, ja napiŭsia, karaciej, pajšoŭ u vajenkamat. U hety ž dzień mianie prosta adpravili na vajnu», — skazaŭ Vadzim Zajkoŭski.
Videazapis ź im apublikavali ŭ Telegram-kanale «Nie ždi mienia iz Ukrainy».
Pavodle jaho słoŭ, jamu nie vypłacili hrašovaje zabieśpiačeńnie — ni zarobak, ni inšyja vypłaty. Zajkoŭski śćviardžaje, što apynuŭsia na vajnie tamu, što jon «niedaloki», i kali b byŭ razumniejšy, to nie pajšoŭ by vajavać.
«Ja nie chaču, kab moj syn išoŭ na vajnu za Rasiju. Ja ŭvohule nie chaču, kab jon vajavaŭ», — dadaŭ jon.
Vadzim Zajkoŭski taksama skazaŭ, što jamu paabiacali abaviazak vazić vadu i pradukty sałdatam u akopy. Paśla padpisańnia kantrakta jon nie prachodziŭ padrychtoŭku, a kali apynuŭsia na froncie — siadzieŭ na pastu pavietranaha nazirańnia, hladzieŭ za palotami dronaŭ, kab «jany nie pierasiekli našu miažu».
Pierad kamieraj biełarus siadzieŭ u majcy z nadpisam «Biełaruś» i vyjavaj dziaržaŭnaha čyrvona-zialonaha ściaha.
«U nas telebačańnie ŭ Biełarusi zajmajecca prapahandaj. U nas kažuć, što vajna budzie iści da pieramožnaha zaviaršeńnia. Heta ŭ Biełarusi», — skazaŭ Zajkoŭski.
U raniej apublikavanych śpisach hramadzian Biełarusi, jakija vajujuć na baku Rasii suprać Ukrainy, jaho proźvišča niama. Jon naradziŭsia 5 listapada 1966 hoda.
245-y hvardziejski motastrałkovy połk padparadkoŭvajecca Suchaputnym vojskam Rasii (vajennaja častka 60888). Połk udzielničaŭ u šturmie Hroznaha ŭ 1999 hodzie, ale ŭ 2008-m byŭ rasfarmavany. Jaho adnavili ŭ 2023 hodzie.
Ciapier, z ulikam Vadzima Zajkoŭskaha, va ŭkrainskim pałonie znachodziacca 10 hramadzian Biełarusi.
Kamientary
[Zredahavana]