Łukašenka sustreŭsia ŭ Minsku z kardynałam Hudžeroci, abmiarkoŭvać mahli izalacyju Biełarusi i palitviaźniaŭ
Alaksandr Łukašenka sustreŭsia z prefiektam Dykasteryi pa spravach Uschodnich cerkvaŭ u Vatykanie kardynałam Kłaŭdya Hudžeroci, piša BiełTA.
«Ja aznajomiŭsia ŭ detalach z vašym vizitam. Vielmi rady, što vy ŭspomnili Biełaruś i vam spadabałasia Biełaruś, spadabalisia našy ludzi. Usie. Nie tolki kataliki, pravasłaŭnyja. I inšyja ludzi. I navat musulmanie vielmi dobra ŭspryniali vaš vizit. Heta kaža pra toje, što vaš śled u Biełarusi, prabačcie za taŭtałohiju, nie biesśledny, — skazaŭ jon. — Tamu ja ščyra rady sustrecca z vami. Ja pamiataju ŭsie našy sustrečy, razmovy, pieramovy, abaviazacielstvy, jakija my vykonvajem, vykanali abo niešta nie vykanali — my siońnia z vami ščyra pa-družalubna pahavorym pra heta. Ja vielmi rady sustrecca i abmierkavać usie pytańni, jakija, mahčyma, nazapasilisia ŭ našych adnosinach».
Kardynał Kłaŭdya Hudžeroci naviedvaje Biełaruś u jakaści śpiecyjalnaha pasłańnika Papy Ryma Lva XIV dla ŭdziełu ŭ uračystaściach z nahody śviatkavańnia 100‑hodździa Pinskaj jeparchii. Na vychodnych jon braŭ udzieł va ŭračystaściach u Pinsku i Breście.
Alaksandr Łukašenka pavinšavaŭ Kłaŭdya Hudžeroci z davoli paśpiachovaj słužbaj: «Taksama naziraju ŭvažliva. Ja vielmi rady za vas. I zaŭsiody liču, što ŭ vašym pośpiechu jość maleńkaja častka biełaruskaj dušy. Tamu my vas vitajem tut. U luby čas pryjazdžajcie. Ja nie viedaju, jakaja viza jamu patrebna. Jon u nas biełarus faktyčna».
Kłaŭdya Hudžeroci byŭ apostalskim nuncyjem (pasłańnikam Vatykana) u našaj krainie z 2011 pa 2015 hod.
U vieraśni 2012 hoda jon rabiŭ vizit u turmy, dzie ŭtrymlivalisia biełaruskija palityčnyja źniavolenyja. Jon tady naviedaŭ niekalki pienitencyjarnych ustanoŭ, dzie asabista pieradaŭ vitańni i duchoŭnuju padtrymku palitviaźniam ad Papy Bieniedykta XVI. Siarod ich byli, naprykład, Aleś Bialacki, Źmicier Daškievič, Pavieł Sieviaryniec.
Taksama Kłaŭdya Hudžeroci spryčyniŭsia da viartańnia ŭ krainu Tadevuša Kandrusieviča, jakoha ŭłady ŭ 2020 hodzie nie puskali nazad.
Nuncyj Hudžeroci nieadnarazova maliŭsia na Dziady ŭ Kurapatach, a kali byŭ nuncyjem u Vialikabrytanii, pieryjadyčna naviedvaŭ Biełaruskuju biblijateku imia Skaryny ŭ Łondanie.
Jak miarkujecca, padčas hetaj sustrečy Alaksandra Łukašenki i Kłaŭdya Hudžeroci mahli abmiarkoŭvacca ŭ tym liku mižnarodnaja izalacyja Biełarusi, situacyja z pravami i svabodami ŭ krainie, a taksama los zakładnikaŭ — palityčnych źniavolenych, siarod jakich jość taksama niekalki śviataroŭ.
Kamientary