Što ludzi kažuć ab prajeździe praz «Bruzhi» i «Bierastavicu» i čamu ŭ apošniaj stajać pa 12 hadzin
A 2‑j hadzinie nočy 17 listapada na biełaruska-polskaj miažy znoŭ adkrylisia adrazu dva pierachody: «Bruzhi — Kuźnica» i «Bierastavica — Babroŭniki». «Naša Niva» pahladzieła, jak ludzi pierasiakajuć miažu ŭ pieršyja hadziny pracy, što pakazvaje pačatkovaja statystyka i jak źmianilisia aŭtobusnyja maršruty.
«Najlepšaja navina za apošnija piać hadoŭ»
Navina pra adnaŭleńnie pracy adrazu dvuch punktaŭ propusku na miažy z Polščaj była ŭspryniataja biełarusami maksimalna pazityŭna. Radasnyja vodhuki pisali nie tolki ŭ admysłovych pryhraničnych čatach, ale i ŭ kamientarach pad navinami ŭ sacsietkach.
Asabliva nie skupilisia na radasnyja kamientary padpisčyki hrodzienskich pablikaŭ.
«Usich ź vialikim śviatam!!! Dačakalisia», — hučyć samy załajkany kamientar pad adnoj z publikacyj, pryśviečanaj adkryćciu miažy ŭ Instagram-akaŭncie «AŭtaHrodna».
«Navina, jakoj mnohija čakali piać hadoŭ! I sapraŭdy, sa śviatam», — hučyć kamientar z 63 padabajkami.
«Sa śviatam nas. Ura!!!» — kaža inšy.
Taksama ŭ kamientarach chapaje žartaŭ pra rost cen na VW Passat B3/B4 — ulubionyja aŭto dla pieravozki paliva, bo ŭ ich bak na 100 litraŭ.
«Padrychtavać pasaty B3», — napisaŭ karystalnik i sabraŭ 59 padabajek.
Niekatoryja žartavali, što ŭ kantrabandystaŭ budzie sapraŭdny ekstaz ad takich navin. A dla poŭnaha ščaścia ciapier treba naładzić atrymańnie viz, jak heta było raniej.
Vialikaha ažyjatažu nie nazirałasia
Niahledziačy na toje, što ŭ sacsietkach i pryhraničnych čatach było šmat radaści, na miescach vialikaha ažyjatažu nie nazirałasia.
Pierad samym adkryćciom miažy polskim bokam vyjezdu ź Biełarusi čakali ŭsiaho 138 lehkavikoŭ: 73 u «Bierastavicy», 65 u «Bruzhach» i jašče 5 aŭtobusaŭ.
U «Bruzhach» čarha rassmaktałasia ŭžo bližej da šostaj ranicy, a ŭ «Bierastavicy» — kala dziasiataj ranicy.
Pieršyja ŭražańni ad «Bruzhoŭ» — pazityŭnyja
Ludzi, jakija byli zarehistravanyja čaćviortymi ŭ zonie čakańnia, spravazdačylisia ŭ adnym z čataŭ, što pierasiekli abiedźvie miažy za 26 chvilin.
Była nievialikaja čarha i z Polščy ŭ Biełaruś. U «Kuźnicy» pierad adkryćciom jana raściahnułasia amal na kiłamietr, ale za niekalki hadzin rassmaktałasia. I kali nočču miažu pierasiakali za try hadziny, to ranicaj i ŭ pieršaj pałovie dnia abiedźvie miažy ludzi pierajazdžali mienš čym za paŭhadziny.
Paźniej čarha na vyjezd z Polščy ŭ Biełaruś pačała znoŭ źbiracca. Pry najaŭnaści 40—50 aŭto pierad šłahbaumam prajezd miažy zajmaje kala troch hadzin — dzielacca ŭ čatach.
Pa stanie na 20:00 17 listapada čarha raściahnułasia na ŭsiu viosku Kuźnica — ad šłahbauma da darožnaha znaka.
Na vyjezd ź Biełarusi ŭ toj ža čas čarhi ŭ «Bruzhach» niama.
Ahułam za pieršyja 18 hadzin pracy «Bruzhoŭ» u Polšču prajechali kala 270 mašyn. Kali temp zachavajecca, to za sutki budzie kala 350 aŭto. Ale heta pry ŭmovie, što pastajannaj čarhi niama.
«Bierastavica» — vielmi marudna
Ź Biełarusi ŭ Polšču za pieršyja 18 hadzin pracy vyjechała 122 lehkavyja aŭto, 6 aŭtobusaŭ i 18 fur.
Dziakujučy adnaŭleńniu pracy «Bierastavicy» aŭtobusy i maršrutki z Hrodna ŭ Biełastok i Varšavu ciapier jeduć praź jaje.
Pry hetym ludzi ŭ čatach skardziacca, što polski bok u «Babroŭnikach» pracuje vielmi marudna. Na prachodžańnie miažy idzie pa 7—8 hadzin. Aŭtobus Hrodna — Biełastok, jaki a 8:40 zajechaŭ u zonu čakańnia, pierasiek miažu naohuł biez małoha praz 10 hadzin — a mienavita a 18:30. Inšyja paśpiavali prajści miažu krychu chutčej — za 8 hadzin.
Ź lehkavymi aŭto taksama ŭsio nie chutka. Ludzi, jakija a 4 ranicy zajechali ŭ zonu čakańnia, u Polšču trapili tolki a 15:30, to-bok bolš čym praz 11 hadzin.
Toje samaje i na zvarotnym šlachu. Ludzi skardziacca, što pa 40 chvilin stajać na miescy. A tyja, chto na miažy z 8:30, prajšli polski bok miažy tolki a 17 hadzinie.
Niekatoryja navat pišuć, što ludzi, jakija, pahladzieŭšy na marudnuju pracu ŭ «Babroŭnikach», vyjechali z čarhi i pajechali ŭ «Kuźnicu», prajšli miažu našmat chutčej za tych, chto zastaŭsia ŭ «Babroŭnikach».
Što tyčycca hruzavoha transpartu, to i tam situacyja anamalnaja. Za 18 hadzin pracy ź Biełarusi ŭ Polšču prajechali ŭsiaho 18 hruzavikoŭ.
Pa stanie na 20 hadzin 17 listapada, u čarzie na vyjezd ź Biełarusi ŭ Polšču staić 25 fur.
A z Polščy ŭ Biełaruś — kala 200 hruzavikoŭ.
Ludzi, jakija zachraśli ŭ «Bierastavicy», rajać inšym jechać praz «Bruzhi», bo za hadzinu polski bok zapuściŭ na miažu try lehkavyja aŭto i adnu furu.
Čamu ŭ «Bierastavicy» ruch taki pavolny — nieviadoma. Adny miarkujuć, što heta praz skanavańnie pašpartoŭ, inšyja — što praz toje, što pracujuć stažory.
Što ludzi kažuć ab prajeździe praz «Bruzhi» i «Bierastavicu» i čamu ŭ apošniaj stajać pa 12 hadzin6
Što ludzi kažuć ab prajeździe praz «Bruzhi» i «Bierastavicu» i čamu ŭ apošniaj stajać pa 12 hadzin
«Naiŭna spadziavalisia zarablać u Jeŭropach, pryjazdžać dadomu lačyć zuby na chalavu i zdavać kvateru». Prapahanda pačała apraŭdvać darahija žyroŭki dla «darmajedaŭ»1919
Kamientary