Uitkaf i Kušnier da Isłamabada nie dajechali. Tramp rastłumačyŭ čamu
Prezident ZŠA Donald Tramp rastłumačyŭ, čamu admianiŭ pajezdku svaich pradstaŭnikoŭ u pakistanski Isłamabad na pieramovy ab Iranie. Pavodle jaho słoŭ, mierkavany vizit śpiecpasłańnika Styva Uitkafa i ziacia Trampa Džareda Kušniera byŭ admienieny paśla taho, jak ministr zamiežnych spraŭ Irana Abbas Arahčy admoviŭsia prymać umovy Vašynhtona i pakinuŭ Pakistan, piša Reuters.
Tramp rezka raskrytykavaŭ iranskaje kiraŭnictva, užo nie pieršy raz zajaviŭšy, što ŭ Iranie nibyta niama adzinstva i zrazumiełaha lidarstva. Jon padkreśliŭ, što, na jaho dumku, ZŠA znachodziacca ŭ bolš mocnaj pazicyi i «majuć usie kozyry», u toj čas jak Iran — nie. Taksama jon adznačyŭ, što kali Tehieran choča pieramoŭ, to pavinien sam inicyjavać kantakt.
Napružańnie pamiž ZŠA i Iranam abvastryłasia paśla avijaŭdaraŭ u ZŠA i Izraila ŭ kancy lutaha. U adkaz Iran nanios udary pa izrailskich i amierykanskich abjektach i faktyčna abmiežavaŭ ruch praz Armuzski praliŭ — klučavy maršrut dla suśvietnych pastavak nafty.
Choć ciapier pamiž bakami dziejničaje pieramirje, istotnaha prahresu ŭ pieramovach pakul niama. Situacyju ŭskładniaje siarod inšaha toje, što Iran patrabuje spynieńnia izrailskich udaraŭ pa Livanie jak umovy dla dalejšaha dyjałohu, na što nie pahadžajecca Izrail.
Kamientary