Pa viartańni z Maskvy Łukašenka pašychtavaŭ śpiecnaz
Pierad vybarami jamu cisnuć na psichiku, pałochajučy mahčymaj śpiecapieracyjaj FSB. Piša ŭ svaim błohu na NN Alaksandr Kłaskoŭski.
Paśla niaŭdałych pieramoŭ u biełakamiennaj biełaruski kiraŭnik naviedaŭ 15 červienia kadebisckuju «Alfu». Mahčyma, narada płanavałasia raniej, ale atrymałasia simptamatyčna.
Pierad vybarami Łukašenku cisnuć na psichiku, pałochajučy mahčymaj śpiecapieracyjaj FSB. I heta badaj što daje efiekt. Mahčyma tamu, što praz epapieju intryh za šyrmaj «bratniaj intehracyi» PPRB zanadta dobra vyvučyŭ noravy picierskich chłopcaŭ.
Vyniki pieramoŭ 11 červienia ŭpeŭnienaści Łukašenku vidavočna nie dadali. Pravalnym akazaŭsia ŭžo pieršy, raźličany na publiku akord — sproba pažartavać pierad kamierami na pačatku sustrečy z Pucinym. Rasijskija miedyi pa poŭnaj adciahnulisia na epizodzie «mo' choć kavałak chleba daście».
Zakulisnaja častka pieramoŭ z abodvuma duumvirami naŭrad ci była bolej udałaj dla hościa. Inačaj by tutejšaja prapahanda ŭžo hrymieła.
Karaciej,
u Minsku pieraacanili mahčymaść zhulać na zacikaŭlenaści Maskvy ŭ Mytnym źviazie.
Kaniečnie, jany zacikaŭlenyja, ale razvažajuć tak: kudy jon dzieniecca z padvodnaj łodki! Jašče i ambasadar Surykaŭ trochi papałochaŭ: voś začynim miažu — tady paskačacie!
Bieź ilhotaŭ ža kštałtu biazmytnaj nafty ŭsie płany pra 500 dołaraŭ nakryvajucca miednym tazam.
Voś užo i pra adnaŭleńnie supracy z MVF ministr Charkaviec zahavaryŭ. A to krucili nosam: abydziemsia biez vašych stend-bajaŭ!
I ŭsio bolej arhumientaŭ za toje, kab vybary zładzić da zimy. Bo tam vymaloŭvajucca, jak zaznačaje analityk Valer Karbalevič, dźvie vajny — naftavaja dy hazavaja. Z bukietam nastupstvaŭ, jakich Łukašenku tolki i niestavała padčas elektaralnaj kampanii.
Rasijskija vialikadziaržaŭniki ćvierdzili, što ŭ ich impieryi jość dva chaŭruśniki — vojska dy fłot. Łukašenka pa viartańni z Maskvy mo' padśviadoma zhadaŭ pra takoje apiryšča, jak śpiecnaz KDB. Los Bakijeva, sami razumiejecie, nie natchniaje.
«Dobra, što ŭ nas jość čym vajavać», — šmatznačna vyrvałasia z vusnaŭ aficyjnaha lidera krainy, dzie kožnuju ranicu pa TB hučyć «My, biełarusy, mirnyja ludzi…».
Ciapier čytajuć
28‑hadovaj biełaruscy paśla žudasnaj avaryi ŭ Tajłandzie nie mohuć akazać dapamohu — niama patrebnaj kryvi1
Kamientary