Уладыка Філарэт падаў у адстаўку, кіраўніком БПЦ прызначаны мітрапаліт Разанскі Павел — не беларус і які ніколі не жыў у Беларусі

Мітрапалітам Мінскім і Слуцкім прызначаны мітрапаліт Разанскі і Міхайлаўскі Павел, паведамляе афіцыйны сайт Маскоўскага Патрыярхата.

Мітрапаліт Разанскі і Міхайлаўскі Павел нарадзіўся 19 лютага 1952 г. у Карагандзе ў сям'і рабочых. Адслужыў у арміі, трохі папрацаваў слесарам. У 1973—1976 гадах вучыўся ў Маскоўскай духоўнай семінарыі. У 1980 годзе скончыў Маскоўскую духоўную акадэмію са ступенню кандыдата багаслоўя.

Ад 1979 года працаваў, як і Філарэт, у Аддзеле замежных царкоўных зносінаў. У савецкі час гэты аддзел, як сцвярджаюць даследчыкі, быў моцна інфільтраваны савецкімі спецслужбамі. Панамароў працаваў тады на «гарачым кірунку» — кіраўніком місіі РПЦ у Іерусаліме.

Рашэннем Святога Сінода ад 19 лютага 1992 г. быў вызначаны епіскапам Зарайскім, які кіраваў патрыяршымі прыходамі ў ЗША і часова ў Канадзе. У 1999 годзе прызначаны епіскапам Венскім і Аўстрыйскім. У 2001 годзе ўзведзены ў сан архіепіскапа з тытулам Венскі і Будапешцкі.

Рашэннем Святога Сінода ад 5—6 кастрычніка 2011 яму быў прысвоены тытул Разанскі і Міхайлоўскі, ён быў прызначаны кіраўніком новастворанай Разанскай мітраполіі. 8 кастрычніка 2011 г. узведзены ў сан мітрапаліта.

Сёння, 25 снежня, Святы Сінод пастанавіў задаволіць прашэнне, пададзенае мітрапалітам Мінскім і Слуцкім Філарэтам, Патрыяршым Экзархам усяе Беларусі, аб адстаўцы ў сувязі з дасягненнем 75- гадовага ўзросту.

Мітрапаліт Філарэт, як вядома, цяжка хварэў на дыябет.

Мітрапаліт Філарэт (Вахрамееў) таксама не быў беларусам і таксама да прызначэння ніколі не працаваў у Беларусі.

Многія япіскапы і святары праваслаўнай царквы спадзяваліся, што новым кіраўніком царквы стане гэтым разам беларус. Называліся імёны архіяпіскапа віцебскага, япіскапа Навагрудскага або, прынамсі, архіярэяў-беларусаў, што служаць у Расіі. Бо ж і Украінскай, і Польскай, і іншымі праваслаўнымі цэрквамі кіруюць мясцовыя людзі.

Аднак патрыярх Кірыл сваім рашэннем паставіў у Мінск чужога чалавека. Гэтым ён падкрэсліў залежны статус Беларускай праваслаўнай царквы. Гэта таксама выяўляе недавер Масквы да беларусаў.

Гэта таксама пэўны выклік Аляксандру Лукашэнку, які сцвярджае, што ў саюзе з Расіяй Беларусь мае незалежнасць.

Прызначэнне Паўла можа выклікаць пратэст і расчараванне ва ўлонні беларускага праваслаўя, анітрохі не менш старажытнага, чым маскоўскае.

Апытанка

• 0
• 0
• 0
• 0
• 0
• 0
• 0
• 0