Нашы карэспандэнты былі ўражаныя колькасьцю людзей, якія адгукнуліся на заклік інтэрнэт-супольнасьці падтрымаць найстарэйшую беларускую газэту. Тры сотні чалавек сабраліся на месцы, дзе стаяў намётавы гарадок, і адначасова разгарнулі прынесеныя з сабою нумары «НН».
Салігорская акцыя сабрала каля трыццаці чалавек.
Фота Алеся Міхалка
Нашы карэспандэнты былі ўражаныя колькасьцю людзей, якія адгукнуліся на заклік інтэрнэт-супольнасьці падтрымаць найстарэйшую беларускую газэту. Тры сотні чалавек сабраліся на месцы, дзе стаяў намётавы гарадок, і адначасова разгарнулі прынесеныя з сабою нумары «НН». Відовішча ўражвала. Газэтаў на ўсіх не хапала: набыць «Нашу Ніву» ў Менску зараз практычна немагчыма. «Ну адарвіце нам хоць пару старонак!» – сьмяяліся тыя, хто прыйшоў з пустымі рукамі.
Сярод флэш-мобаўцаў вылучаліся заўсёдныя праваахоўнікі ў цывільным. Таксама з газэтамі ў руках. Некаторыя паапраналі пінжакі. Маўляў, газэта ж для інтэлігенцыі, у спартовым касьцюме неяк няёмка... Потым грамада, чытаючы газэты, рушыла праспэктам да плошчы Перамогі.
Цішыню парушалі супрацоўнікі сілавых структур, якія па гучнай сувязі папярэджвалі чытальнікаў пра адказнасьць. На мосьце цераз Сьвіслач спаткалі здымачную групу БТ, якая працавала над якімсьці сваім сюжэтам. Відавочцы казалі, што апэратар, пабачыўшы людзей зь незалежнай прэсай у руках, кінуўся з праспэкту хавацца пад мост.
Людзі на праспэкце на флэшмоб рэагавалі жыва. «Ну і дзе ж ваш Мілінкевіч?» – пыталася кабета, пабачыўшы ў моладзі значкі «За Свабоду». «Сядзіць Мілінкевіч!» «Як сядзіць?!» – іронія зьмянілася зьдзіўленьнем і абурэньнем.
Пасьля сканчэньня акцыі, калі людзі разыходзіліся з плошчы Перамогі, спэцназаўцы ў цывільным паспрабавалі схапіць двух удзельнікаў. Але на дапамогу ім кінуліся іншыя і вырвалі з рук міліцыянтаў. Тады «ціхары» зьмянілі тактыку. Яны затрымалі некалькі чалавек на вуліцы Кісялёва і яшчэ пяць чалавек на вуліцы Янкі Купалы. Затрыманых адвезьлі ў аддзел міліцыі Цэнтральнага раёну й перапісалі пашпартныя зьвесткі.
Флэш-моб салідарнасьці з «НН» у Менску. Трыста чалавек прайшлі ад Кастрычніцкай плошчы да плошчы Перамогі.
Фота Юліі Дарашкевіч
* * *
2 траўня флэшмоб у падтрымку «НН» адбыўся ў Салігорску. Тры дзясяткі юнакоў і дзяўчат а 20-й сабраліся на цэнтральнай плошчы і дэманстратыўна чыталі «Нашу Ніву».
* * *
А 4 траўня флэшмобэраў з «Нашай Нівай» ды іншымі незалежнымі газэтамі затрымлівалі ля выстаўнага комплексу «Белэкспа», дзе праходзіла афіцыйная выстава СМІ.
* * *
Дзякуй усім удзельнікам флэшмобаў. Сваімі ўчынкамі вы надаяце нам новую сілу, каб працаваць. Галоўным сродкам барацьбы Рэдакцыі будзе выдаваньне «Нашай Нівы». А вы таксама пішэце ў яе і бярэце ўдзел у распаўсюдзе. Гэта наш галоўны моб.
Сяргей Мікулевіч
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2525
Каментары