У суботу на трыбунах 9-тысячнай «Чыжоўка-Арэны» прайшла цырымонія адкрыцця фінальнага матчу Кубка Федэрацыі паміж тэнісісткамі зборных Беларусі і ЗША.
Сярод заўзятараў быў і Аляксандр Лукашэнка. Абапал яго сядзелі былая гімнастка Ксенія Санковіч і кіраўнік тэніснай федэрацыі Сяргей Цяцерын. Таксама побач былі заўважаныя бізнэсоўцы Аляксандр Шакуцін (сядзіць справа ад Цяцерына) і Аляксандр Машэнскі (у тым жа шэрагу, далей злева), расійскі прадзюсар Віктар Дробыш (яшчэ далей злева), прэс-сакратарка прэзідэнта Наталля Эйсмант і прыгажуня з службы пратакола Дар'я Шманай (перад Лукашэнкам). А шэрагам вышэй сядзела кіраўніца Адміністрацыі Наталля Качанава.
Для беларускіх тэнісістак гэта першы ў гісторыі выхад у фінал Кубка Федэрацыі, а зборная ЗША з'яўляецца рэкардсменам па колькасці перамог — у яе 17 чэмпіёнскіх тытулаў. Сёння гуляюць другі нумар беларускай каманды Аляксандра Сасновіч і першая ракетка амерыканскай дружыны Кока Вандэвеге.
12 лістапада адбудуцца яшчэ два адзіночныя паядынкі: Арына Сабаленка — Кока Вандэвеге, Аляксандра Сасновіч — Слоан Стывенс. Пасля пройдзе парная сустрэча, у якой беларускі Вера Лапко і Лідзія Марозава будуць супернічаць з амерыканкамі Элісан Рыске і Шелбі Роджэрс.
Каментары