Што за гісторыю пра «4 затрыманых супрацоўнікаў расійскага ГРУ» расказвае Лукашэнка?
Пасля размовы Аляксандра Лукашэнкі з работнікамі праўладных СМІ аналітык «Белай Русі» Пятро Пятроўскі паспяшаўся паведаміць у фэйсбуку: у Беларусі былі затрыманыя чацвёра супрацоўнікаў ГРУ Расіі.
Гэтую інфармацыю ён пацвердзіў і «Камсамольскай праўдзе». Праўда, пасля Пятроўскі выдаліў свой допіс, напісаў, што пажартаваў, а праз час прыбраў і гэтыя словы.
Чытайце. Пятроўскі: Лукашэнка расказаў пра затрыманне ў Беларусі чатырох супрацоўнікаў ГРУ Расіі
ГРУ — расійская вайсковая выведка. Цяпер ведамства афіцыйна называецца Галоўнае упраўленне Генеральнага штаба Узброеных сіл Расіі, але на побытавым узроўні выкарыстоўваецца старое імя.
Па інфармацыі «Нашай Нівы», гісторыя пра затрыманых работнікаў ГРУ ўсплывае не ў першы раз. Падобнае гучала і падчас візіту Лукашэнкі ў Гродна (16 чэрвеня), і на сустрэчы Наталлі Качанавай з творчай інтэлігенцыяй краіны (1 ліпеня).
Адзін з удзельнікаў сустрэчы Наталлі Качанавай з прадстаўнікамі інтэлігенцыі падзяліўся з «Нашай Ніва» дэталямі. Там прысутнічаў і кіраўнік Камітэта дзяржаўнай бяспекі Валерый Вакульчык.
Вакульчык узяў там слова і расказаў, што чатыры чалавекі ўехалі ў Беларусь з дапамогай Міхаіла Бабіча, у час, калі ён быў паслом Расіі. Яны сталі наведваць прадпрыемствы краіны, «прыглядацца». На сустрэчы нават называлі прозвішчы тых супрацоўнікаў ГРУ, іх высокія вайсковыя чыны і зачытвалі ўрыўкі з данясенняў Бабіча вышэйшаму кіраўніцтву.
Трэба адзначыць, што блізкія да сілавых колаў тэлеграм-каналы ўжо троху пісалі на гэтую тэму, праўда, гаворка была не пра ГРУ, а пра ФСБ: аднаму з паплечнікаў Сяргея Ціханоўскага прыпісвалася супрацоўніцтва з расійскай службай і мэтанакіраваны пошук дыскрэдытуючай і персанальнай інфармацыі пра беларускіх міліцыянераў з наступным яе апублікаваннем.
Варта таксама прыгадаць цьмяную гісторыю высылкі з Мінска расійскіх дыпламатаў з кампаніі Бабіча, у тым ліку ваеннага аташэ Рамана Спірыдонава, які быў даказаным супрацоўнікам спецслужбаў.
Чытайце: З Беларусі выехаў расійскі аташэ па пытаннях абароны. Падазравалі ў шпіянажы?
Крыніцы «Нашай Нівы» тады паведамлялі, што Спірыдонаў быў высланы за дзейнасць, якую не назавеш дыпламатычнай, але і расійскае пасольства, і беларускі МЗС даводзілі, што ўсё адбываецца ў межах дзяжурнай ратацыі.
Праўда, неўзабаве за Спірыдонавым Мінск пакінулі яшчэ некалькі работнікаў пасольства, якіх прыцягнуў з сабой Бабіч.
Можа, гаворка менавіта пра іх?
Чым можна патлумачыць урыўкавасць і туманнасць звестак пра імаверных расійскіх спецслужбістаў? Справа ў тым, што спецслужбы краін СНД павінны ў сваёй дзейнасці кіравацца Алма-Ацінскай дэкларацыяй, згодна з якой удзельнікі абавязуюцца не весці ў дачыненне адзін да аднаго негалоснай агентурнай і шпіёнскай работы.
Аналагічныя пагадненні існуюць паміж спецслужбамі Беларусі і Расіі.
І калі насамрэч былі затрыманыя афіцэры службаў дзяржаўнай бяспекі ваеннага і палітычнага саюзніка нашай краіны, вымалёўваюцца абрысы дыпламатычнага скандала, да якога Мінск не гатовы.
«Шматпартыйнасць, плюралізм меркаванняў — гэта брахня, заходняя брахня». Лукашэнка разглядае канстытуцыйнае вяртанне да савецкай сістэмы75
Каментары