У Антарктыдзе рэзка скарацілася калісьці найбуйнейшая калонія пінгвінаў. Іх меней аж на паўмільёна
На антарктычным востраве Завадоўскага ў Паўднёвым акіяне за 13 гадоў колькасць пінгвінаў скарацілася на дзве траціны. Востраў, які раней лічыўся месцам найбуйнейшай у свеце калоніі гэтых птушак, мог страціць свой статус. Навукоўцы асцерагаюцца, што антарктычныя пінгвіны могуць апынуцца пад пагрозай знікнення, піша The Guardian.
Востраў Завадоўскага — самы паўночны з Паўднёвых Сандвічавых астравоў. Ён размешчаны больш як за 1900 кіламетраў ад найбліжэйшага пастаяннага паселішча, таму навукоўцы наведваюць яго рэдка. Тут жывуць два віды пінгвінаў: антарктычныя, якія маюць чорную палоску пад дзюбай, і золатавалосыя, якіх можна пазнаць па жоўтых чубках.
У 2011 годзе на выспе налічвалася каля 600 тысяч антарктычных і 90 тысяч золатавалосых пінгвінаў. Дзякуючы гэтаму калонія лічылася найбуйнейшай у свеце. У той час на некаторых іншых антарктычных выспах колькасць пінгвінаў ужо скарачалася амаль напалову ў параўнанні з паказчыкамі 1980‑х гадоў, але востраў Завадоўскага здаваўся выключэннем.
У 2023 годзе даследчыкі Брытанскай антарктычнай службы некалькі дзён вывучалі птушак на востраве. Яны выкарыстоўвалі беспілотнікі, аэрафотаздымкі з самалёта і спецыяльныя прылады сачэння, замацаваныя на пінгвінах.
Параўнаўшы аэрафотаздымкі з данымі спадарожнікаў, навукоўцы высветлілі, што з 2011 да 2025 года колькасць занятых гнёздаў антарктычных пінгвінаў зменшылася на 63%. Паводле падлікаў, штогод іх колькасць скарачаецца прыкладна на 7% — гэта самы высокі паказчык для гэтага віду ў свеце, у два-тры разы большы, чым у іншых рэгіёнах.
Кіраўнік даследавання, эколаг Норман Рэдкліф, назваў гэта велізарным абвалам папуляцыі, які эквівалентны страце паўмільёна пінгвінаў рэпрадуктыўнага ўзросту на выспе.
Навукоўцы лічаць, што адной з найбольш верагодных прычын скарачэння папуляцыі сталі кліматычныя змены. У выніку пацяплення зімовыя тэмпературы на Антарктычным паўвостраве і вакол яго выраслі на 5 градусаў у параўнанні з даіндустрыяльным перыядам.
Антарктычным пінгвінам складана прыстасавацца да новых умоў, бо іх рацыён даволі спецыфічны. Яны шукаюць ежу пераважна ў халодных водах і харчуюцца крылем — дробнымі ракападобнымі, якія складаюць асноўную частку іх рацыёну. Аднак праз пацяпленне крыль перамясціўся далей на поўдзень.
У 2016 годзе на востраве адбылося магутнае вывяржэнне вулкана, пасля якога ўзнікла гіпотэза пра «пінгвінавыя Пампеі». Аднак яна не пацвердзілася: скарачэнне папуляцыі пачалося за некалькі гадоў да вывяржэння, а пінгвіны пазбягалі тэрыторый, пакрытых попелам і лавай.
Пры гэтым колькасць золатавалосых пінгвінаў на выспе, наадварот, павялічылася на 30%. Такім чынам, пацяпленне магло па-рознаму паўплываць на два віды. Аднак, паводле Рэдкліфа, калі цяперашнія тэндэнцыі захаваюцца, з часам усім птушкам можа не хапіць месца. Знікненне антарктычных пінгвінаў таксама негатыўна адаб'ецца на харчовых ланцужках.
Навуковец параўнаў экасістэму з вялікай вежай Джэнга: калі прыбіраць з яе асобныя элементы, рызыка поўнага руйнавання ўсёй сістэмы ўзрастае.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары