Назіральніка вынеслі з участка на насілках: яму стала блага пасля гутаркі са старшынёй камісіі
Незалежнаму назіральніку Галіне Крыстыновіч стала блага пасля эмацыйнай размовы са старшынёй участка і дзяжурным міліцыянерам. 56-гадовую жанчыну вынеслі на насілках медыкі і супрацоўнікі міліцыі. Гэта адбылося 8 жніўня на выбарчым участку №56 у сярэдняй школе №36 у Гродне, піша Hrodna.life.
Галіну павезлі на машыне хуткай дапамогі. Пра падзеі на ўчастку распавёў сведка Віктар Шчыглінскі.
«Мы стаялі пад дзвярыма, кожны на сваім участку. Унутр нікога не пусцілі. Да жанчыны-назіральніка падышоў міліцыянер і старшыня ўчастка. Яна пачала іх здымаць. Старшыня сказаў, што нельга, тады міліцыянер пачаў патрабаваць, каб Галіна выйшла са школы. Яна не згаджалася — пачалі тэлефанаваць у ЦВК, пакуль тэлефанавала — прыехалі хлопцы з РАУС і вывелі яе. Я выйшаў на ганак — жанчына ўжо сядзела на парапеце і сказала, што ёй стала дрэнна — баліць сэрца».
Віктар выклікаў Галіне хуткую. Жанчыну даставілі ў бальніцу хуткай дапамогі, яе здароўю нічога не пагражае.
«У мяне ўжо ўсё добра, зрабілі ўкол і кардыяграму. Шпіталізаваць не будуць, — распавядае Галіна Крыстыновіч. — Я была на ўчастку не проста як назіральнік, але і як выбаршчык. Гэта мой участак. Я задала пытанне старшыні, а мне пачалі расказваць пра мае правы. Выклікалі дзяжурнага супрацоўніка і мяне папрасілі сысці з участку. Прагаласаваць так і не далі. З-за ўсяго гэтага мне стала дрэнна».
Галіна цяпер вяртаецца дадому. Пасля абеду яна плануе вярнуцца на ўчастак.
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»23
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары