Нам заўсёды кажуць пра тое, што недасып шкодзіць здароўю. А што наконт задоўгага сну?
Большасць здаровых дарослых спяць ноччу па 7-9 гадзін. Аднак, згодна з сумеснымі рэкамендацыямі Амерыканскай акадэміі медыцыны сну і Таварыства даследавання сну, некаторым людзям можа спатрэбіцца больш за 9 гадзін начнога адпачынку. Гаворка перш за ўсё пра моладзь, тых, хто доўгі час быў пазбаўлены дастатковай колькасці сну, і людзей з рознымі хваробамі, піша Huffington Post.
Перасыпаннем звычайна лічаць сон, даўжэйшы за 9-10 гадзін. Большасць навукоўцаў звязваюць яго з рызыкай для здароўя і небяспекай узнікнення такіх хвароб, як інсульт, атлусценне, дэпрэсія, дыябет, хваробы сэрца і дэменцыя. Але незразумела, што з’яўляецца першасным: перасыпанне выклікае хваробы, або чалавек шмат спіць праз наяўнасць хвароб.
Эксперты схіляюцца да другога варыянта. Джэйд Ву, псіхолаг сну і даследчык амерыканскага Універсітэта Д’юка, нагадвае, што некаторыя нейрадэгенератыўныя хваробы, як і дэпрэсія, прымушаюць нас адчуваць дрымотнасць на працягу дня.
Дык ці трэба хвалявацца, калі вы заўсёды спіце па 9-10 гадзін? Не абавязкова, тым больш калі вы адчуваеце раніцай, што вы добра адпачылі. Але, калі ёсць іншыя прычыны наведаць доктара, магчыма, варта расказаць яму і пра перасыпанне.
Калі ж вы адчуваеце, што, нягледзячы на вялікую колькасць сну, вам не хапае адпачынку, тым больш трэба пагутарыць з доктарам. Кожнаму патрэбна свая колькасць начнога адпачынку, але яго добрая якасць важная для ўсіх.
Наш сон могуць пагоршыць некаторыя хваробы, а таксама пабочныя эфекты ад лекаў. Стрэс, дрэнны настрой, адчуванне нуды і маларухомы лад жыцця таксама могуць прымушаць нас адчуваць сябе стомленымі нават пры дастатковай колькасці сну.
Ёсць некалькі спосабаў палепшыць свой сон. Можна паспрабаваць класціся спаць і прачынацца заўсёды ў той жа самы час, атрымліваць больш сонечнага святла, павялічыць колькасць фізічнай актыўнасці і камунікацыі з іншымі людзьмі, а таксама больш адпачываць.
Цяпер чытаюць
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі17
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце4141
Каментары