Польскія ўлады выказалі пратэст супраць апаганьвання польскіх могілак у Беларусі
МЗС Польшчы выпусціла заяву, у якой выказала занепакоенасць «апаганьваннем месцаў польскай нацыянальнай памяці, што ўсё часцей адбываецца ў Беларусі».
Паводле заявы, у асноўным гэтыя выпадкі адбываюцца на тэрыторыі Гродзенскай вобласці, дзе знаходзіцца каля 550 месцаў спачыну польскіх жаўнераў, удзельнікаў народных паўстанняў і абаронцаў Гродна.
За апошні час невядомыя спустошылі польскія надмагіллі і помнікі ў Багданах, Бабровічах, Дындылішках, Іўі, Ашмянах, Ёдкевічах, гаворыцца ў заяве.
«Мы рашуча асуджаем стварэнне мясцовымі ўладамі атмасферы згоды на такую практыку. Ім спрыяе паклёпніцкая антыпольская кампанія, якую вядуць беларускія СМІ. Мы звяртаемся да беларускіх уладаў з просьбай неадкладна спыніць акты вандалізму на могілках, выявіць і прыцягнуць да адказнасці вінаватых. Польшча рашуча патрабуе шанаваць магілы і ўшанаваць памяць памерлых. Гэтае пытанне, згодна з міжнароднымі стандартамі, павінна быць цалкам выключанае з цяперашніх палітычных спрэчак», — піша польскае МЗС.
Учора стала вядома пра вандалізм на магіле байца Арміі Краёвай пад Бераставіцай. Мясцовыя жыхары заўважылі, што магілу раскапалі, а ўлады заявілі, што і сам помнік прыбяруць.
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»29
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары