Мікалаю Аўтуховічу за мінулы год не перадалі ніводнай бандэролі
У вязніцы ён сустракаў ужо дзявяты Новы год.
Мікалаю Аўтуховічу за год так і не перадалі за краты ніводнай бандэролі, хаця паводле закону яму належыць атрымаць не меней за адну. Пра гэта «Радыё Свабода» расказала сваячка былога прадпрымальніка і праваабаронцы, якая пражывае ў Польшчы.
«Загадзя адправілі яму бандэроль з віншаваннем і цукеркамі. Разлічвалі, што яшчэ на Раство атрымае, але ўжо і Новы год, а бандэроль так і не дайшла. Высветлілася, што гэты пакет нават з пошты не забралі. Праз інтэрнэт сваякі даведаліся, якая прычына. На сайце пошты прачыталі, што ён нібыта адмовіўся атрымліваць. Але ж гэта няпраўда», — перакананая сваячка Мікалая Аўтуховіча.
Паводле жанчыны, 30 снежня Мікалай коратка тэлефанаваў некалькім сваякам. Крыніца перадала сэнс размоваў з палітвязнем.
«Усіх павіншаваў з надыходзячым Новым годам. Голас быў бадзёры, сказаў пра сябе, што са здароўем у яго збольшага нармальна. Пра бандэроль сказаў, што яму дазволена адна на год, але дагэтуль нічога не атрымаў: «А сам ад бандэролі ніколі не адмаўляюся».
З пачатку снежня 2020 году Мікалай Аўтуховіч адбывае ўжо трэцяе ў сваім жыцці зняволенне. 7 студзеня яму споўніцца 61 год. Усяго, паводле падлікаў сваякоў, палітвязень адзначыў у вязніцах 9 навагодніх святаў і 8 дзён нараджэння. Гэтым разам яму давядзецца сустракаць дзень нараджэння ў адзіночцы гарадзенскай турмы.
«У яго ёсць магчымасць крыху грошай траціць у турэмнай краме. Сказаў, што купіў там печыва і цукерак, таму зможа адзначаць святы з салодкім. У нашай сям’і шмат у каго дні нараджэння прыпадаюць на студзень і пачатак лютага, таму сказаў, што такім чынам адзначыць некалькі запар святаў», — падзялілася суразмоўца.
Паводле выраку Горадзенскага абласнога суду Мікалай Аўтуховіч атрымаў 25 гадоў зняволення і грашовы штраф у 1000 базавых велічынь, а таксама пазбаўленне звання прапаршчыка ў адстаўцы. Першыя 5 гадоў зняволення былы прадпрымальнік і праваабаронца мусіць адбыць у турме, астатнія 20 гадоў — у калоніі строгага рэжыму. Суд назваў Аўтуховіча вінаватым паводле 10 артыкулаў Крымінальнага кодэкса, у тым ліку ў стварэнні злачыннай групоўкі і акце тэрарызму. Сваёй віны Мікалай Аўтуховіч не прызнаў, падчас працэсу ён трымаў галадоўку пратэсту. Вярхоўны суд Беларусі ў выніку разгляду апеляцыйнай скаргі Аўтуховіча вызваліў яго ад адбыцця пакарання паводле аднаго з абвінавачанняў, але агульны тэрмін зняволення пакінуў без зменаў.
Беларускія праваабаронцы прызналі Мікалая Аўтуховіча палітвязнем.
Цяпер чытаюць
Арыштаваны чыноўнік, які мог стаць наступным міністрам аховы здароўя8
Каментары