Стары паплечнік Лукашэнкі параўнаў яго з аяталой Хамейні. Параўнанне так сабе

У 1990-я і нулявыя Канаплёў займаў высокія пасады, быў намеснікам старшыні, а пасля і старшынёй Палаты прадстаўнікоў. Аднак пасля трапіў у апалу, нават пару тыдняў пасядзеў, у выніку выкараскаўся, але ўжо амаль два дзесяцігоддзі займае толькі сціплую пасаду кіраўніка Беларускай федэрацыі гандбола.

У інтэрв'ю ён расказаў, што сябраваў з Лукашэнкам яшчэ з часоў вучобы ў Магілёўскім педагагічным інстытуце, пасля жыццё іх крыху разнесла, але пасля пачатку перабудовы ў СССР, а значыць і адкрыцця магчымасці займацца публічнай палітыкай зноў звяло.

Адносна непасрэднай працы з Лукашэнкам нічога асаблівага Канаплёў не расказаў — збольшага ягоныя расказы толькі пацвярджэнне і без таго вядомых фактаў. Што і зразумела — быць асабліва шчырым, раскрываючы нейкія, магчыма, нязручныя для шэфа таямніцы апальнаму чыноўніку, які шмат ведае, даволі рызыкоўна.

Але ў фармаванне культу асобы Лукашэнкі, стварэнне якога апошнім часам асабліва заўважнае, ягоны былы сябар сваю цаглінку паклаў. Пры гэтым выкарыстаў вельмі арыгінальнае і нечаканае параўнанне:

«Цяпер ён, вядома, ужо мэтр, гэта наш беларускі Хамейні, яго выбраў народ». 

Параўнанне, трэба сказаць, дастаткова двухсэнсоўнае, калі хоць бы павярхоўна ведаць біяграфію таго чалавека, з якім Канаплёў параўнаў Лукашэнку.

Рухала Хамейні — гэта лідар ісламскай рэвалюцыі 1979 года ў Іране, стваральнік той Ісламскай Рэспублікі Іран, якая існуе сёння і з якой мае цесныя палітычныя сувязі Лукашэнка.

Вось толькі народ яго ніколі не абіраў нават фармальна, ды і сама рэлігійная пасада Найвышэйшага кіраўніка Ірана (рахбара), якую займаў Хамейні, гэтага не прадугледжвае.

Усенародна абіраюцца і пераабіраюцца ў Іране, прытым рэгулярна ды ў сапраўды канкурэнтнай барацьбе, хай сабе і толькі ў рамках сістэмы, толькі свецкія прэзідэнты, а рахбары прызначаюцца пажыццёва. Іх і было за ўсю гісторыю Ісламскай Рэспублікі Іран пакуль толькі двое: цяперашні лідар, 85-гадовы Алі Хаменеі, заняў гэтую пасаду 3 чэрвеня 1989 года, пасля смерці 89-гадовага Хамейні.

А прыйшоў у свой час да ўлады Рухала Хамейні такім спосабам, за адну думку пра які беларусы сёння атрымліваюць ад лукашэнкаўскіх судоў вялікія тэрміны зняволення і гнаяцца ў нялюдскіх умовах у турмах — у выніку народных пратэстаў зрынуўшы ўладу шаха Махамеда Рэза Пехлеві, які перад тым кіраваў краінай больш чым 37 гадоў, з 1941 па 1979 гады.

Прытым, як вішанька на торце, перад прыходам да ўлады гэты чалавек быў, карыстаючыся паўафіцыйнай тэрміналогіяй лукашэнкаўскага рэжыму, «збеглым». З 1964 па 1979 год Хамейні жыў у вымушанай эміграцыі ў Турцыі, Іраку і Францыі, атрымліваючы ў тым ліку і рознага кшталту падтрымку ад замежных урадаў для барацьбы з тагачаснай празаходняй іранскай манархіяй.

• 1
• 0
• 9
• 0
• 0
• 0
• 2
• 0