Жыхары Плешчаніц скардзіліся, што дрэвы абрэзалі «пад слуп». Улады сказалі, што ўсё законна, а потым пакаралі вінаватага
Увесну чыноўнікі казалі, што парушэнняў правілаў не ўстаноўлена. Аднак праз паўгода знайшоўся вінаваты ў парушэннях.
Жыхары Плешчаніц, што ў Лагойскім раёне, вясной паскардзіліся ў райвыканкам на дзіўнае абразанне дрэў «пад слуп»: камунальнікі выдалілі з дрэў кроны і пакінулі толькі абсечаныя ствалы.
Петыцыя да ўладаў з'явілася на партале «Зручны горад». Яе аўтары заяўлялі, што камунальнікі парушылі правілы ўтрымання азелянёных тэрыторый, якія забараняюць такое абразанне, піша Blizko.by.
Аўтары петыцыі патрабавалі ад уладаў патлумачыць, на якой падставе праводзіліся работы па краніраванні дрэў з поўным выдаленнем кроны і верхняй часткі ствала дрэва, высветліць службовых асоб, вінаватых у правядзенні работ па краніраванні, а таксама вінаватых у парушэнні нарматываў.
Адказ на зварот прыйшоў за подпісам намесніка старшыні райвыканкама Анжэлы Раеўскай. У ім гаварылася, што чыноўнікі сапраўды выявілі дрэвы, абрэзаныя «пад слуп», аднак ніякіх парушэнняў у гэтым няма.
«Праведзеныя работы не з'яўляюцца абрэзкай, а з'яўляюцца першым этапам работ па выдаленні дрэў на тэрыторыі ў сувязі з іх нездавальняючым станам. Работы па выдаленні дрэў плануецца завяршыць да жніўня 2024 года», — гаварылася ў дакуменце.
Таксама ў адказе гаварылася, што замест высечаных дрэў да лістапада высадзяць новыя.
Аднак у лістападзе з райвыканкама раптам прыйшоў новы адказ — таксама за подпісам Раеўскай. Там гаворыцца, што вінаватага ў парушэнні правілаў, якое чыноўнікі адмаўлялі, знайшлі і пакаралі.
«У сувязі з невыкананнем патрабаванняў артыкула 38 закона Рэспублікі Беларусь ад 14.06.2003 №205-3 «Аб раслінным свеце» на тэрыторыі дзяржаўнай установы «фізкультурна-аздараўленчы цэнтр «Скарб-Спорт» па адрасе: г.п. Плешчаніцы, вул. Савецкая, 11, кіраўнік быў прыцягнуты да адказнасці па артыкуле 16.7 Кодэкса Рэспублікі Беларусь аб адміністрацыйных правапарушэннях», — паведамляецца ў адказе.
Артыкул 16.7 КаАП «Парушэнне патрабаванняў у галіне каранціну і абароны раслін» прадугледжвае штраф 100 базавых велічынь (4000 рублёў). Пры гэтым не зусім зразумела, за што пакаралі службовую асобу: за абразанне дрэў або за тое, што не былі высаджаныя новыя.
-
«Паставілі на лічыльнік яшчэ ў турме». Ігар Карней расказаў, чым скончылася гісторыя з судовымі выканаўцамі і штрафамі
-
87 рублёў заробку і асаблівыя ўмовы для некаторых студэнтаў. Выкладчык БДУІР звярнуўся да Лукашэнкі
-
Першы беларускі пашпарт з «Пагоняй» атрымаў Лукашэнка, а другі — школьнік Юрый Чарняк. Як склаўся лёс хлопца?
Цяпер чытаюць
Першы беларускі пашпарт з «Пагоняй» атрымаў Лукашэнка, а другі — школьнік Юрый Чарняк. Як склаўся лёс хлопца?4
Каментары