У Сірыі затрымалі генерала, адказнага за смяротныя прысуды ў турме Сайдная
Сілы бяспекі новых сірыйскіх уладаў затрымалі генерала Мухамеда Канжо Хасана, які быў кіраўніком вайсковай юстыцыі пры рэжыме Башара Асада.
Паводле даных Сірыйскай абсерваторыі па правах чалавека, Хасан быў арыштаваны ў правінцыі Тартус, якая з’яўляецца аплотам прыхільнікаў Асада, разам з групай з 20 чалавек, піша Bild.
Хасана абвінавачваюць у прамой адказнасці за вынясенне шматлікіх смяротных прысудаў зняволеным у вядомай турме Сайдная, дзе вязняў падвяргалі катаванням і масавым пакаранням.
«Яго імя звязана з бесчалавечным абыходжаннем са зняволенымі і шматлікімі неправамернымі прысудамі», — адзначаецца ў дакладзе цэнтра VDC, які дакументуе парушэнні правоў чалавека ў Сірыі.
Паведамляецца, што падчас спробы затрымання Хасана адбылося ўзброенае сутыкненне паміж сіламі новай і былой улады, у выніку якога загінулі 17 чалавек, уключаючы трох прадстаўнікоў былога рэжыму і 14 байцоў новай адміністрацыі.
Раней Хасан займаў пасаду дырэктара вайсковай судовай сістэмы і падпарадкоўваўся Міністэрству абароны Сірыі. Паводле абвінавачванняў, ён выкарыстоўваў сваё становішча для вымагальніцтва грошай у сем’яў зняволеных, што дазволіла яму назапасіць значны капітал.
Каментары
Сам вінаваты: пачаў адстрэльвацца.