Былы супрацоўнік Службы бяспекі Лукашэнкі стаў выканаўчым дырэктарам у Белгазпрамбанку
У жніўні 2024 года былы супрацоўнік Службы бяспекі Лукашэнкі Сяргей Чэпікаў заняў пасаду выканаўчага дырэктара ў Белгазпрамбанку. Публічна пра гэта нідзе не паведамлялася, піша «Бюро». На сайце Белгазпрамбанка няма ніякіх згадак пра новага выканаўчага дырэктара.
Згодна з данымі, атрыманымі ад «Кіберпартызан», Сяргей Чэпікаў служыў у Службе бяспекі Лукашэнкі як мінімум з 2005-га па 2021 год. У лютым 2020 года ён атрымаў узнагароду «За волю да перамогі» ў міжведамасным турніры па більярдзе за каманду СБП. А ў 2024-м заняў пасаду ў Белгазпрамбанку.
Журналісты патэлефанавалі Сяргею Чэпікаву, і ён пацвердзіў ім сваё прызначэнне. На пытанне, чаму менавіта ён атрымаў дырэктарскую пасаду ў Белгазпрамбанку, Чэпікаў адказаў: «Ну, напэўна, таму што варты».
Паводле слоў Чэпікава, ён не працаваў у СБП менавіта «целаахоўнікам Лукашэнкі». Але чым менавіта займаўся ў гэтай структуры, расказаць не захацеў. У Службу бяспекі Лукашэнкі Чэпікаў трапіў з беларускага войска, дзе ў тым ліку служыў у Кіналагічным цэнтры. Адна з задач цэнтра — падрыхтоўка кадраў для аховы разнастайных асаблівых аб’ектаў.
Гэта не першае прызначэнне былых супрацоўнікаў Службы бяспекі Лукашэнкі на кіраўнічыя пасады ў банках. Раней журналісты выдання «Люстэрка» расказалі пра «галавакружную кар’еру» галоўнага ахоўніка Лукашэнкі Аляксея Ляшкевіча. Яго неаднаразова бачылі ў атачэнні Лукашэнкі, у тым ліку падчас міжнародных паездак.
У лютым 2024 года Ляшкевіч заняў пасаду выканаўчага дырэктара ў Беларусбанку. Паводле слоў крыніцы «Люстэрка» ўнутры банка, гэтая пасада была створаная спецыяльна пад Ляшкевіча, раней выканаўчага дырэктара, які курыруе пытанні бяспекі, у структуры праўлення банка не было.
«Пераапрануўся ў амапаўца і дырыжыраваў чорнай дубінкай». Адзін з заснавальнікаў «Вольнага хору» — пра акцыі ў гандлёвых цэнтрах у 2020‑м і працу ў філармоніі ў Літве55
Каментары