Ізраіль у самы бліжэйшы час дазволіць Іарданіі і ААЭ скідваць гуманітарную дапамогу жыхарам сектара Газа на парашутах. Пра гэта заявіў прадстаўнік COGAT — падраздзялення арміі Ізраіля, якое займаецца грамадзянскімі пытаннямі на палесцінскіх тэрыторыях, паведамляе Бі-бі-сі.
Першай дапамогу такім чынам даставіць Іарданія.
У мінулым годзе, у пачатку вясны, амерыканскія і брытанскія вайскоўцы ў супрацоўніцтве з Іарданіяй, Егіптам і Францыяй ужо скідвалі ў Газу на парашутах прадукты харчавання — дзясяткі тысяч порцый гатовай ежы.
Скід на парашутах лічыцца надзвычай неэфектыўным спосабам дастаўкі гуманітарнай дапамогі. Пра гэта зноў заявіў у пятніцу кіраўнік БАПОР — агенцтва ААН па падтрымцы палесцінскіх уцекачоў — Філіп Лацарыні, назваўшы гэтую ідэю «адцягваннем увагі ад бяздзеяння».
Прадстаўнікі ХАМАС, жыхары сектара Газа, а таксама многія замежныя лідары і гуманітарныя і праваабарончыя арганізацыі ўжо шмат месяцаў гавораць пра тое, што насельніцтву Газы з-за дзеянняў Ізраіля, які абмяжоўвае пастаўкі прадуктаў харчавання, пагражае масавы голад, а многія мясцовыя жыхары ўжо галадуюць. Ізраіль гэтыя абвінавачанні адхіляе і сцвярджае, што не абмяжоўвае аб’ём паставак.
Падкантрольнае групоўцы ХАМАС Міністэрства аховы здароўя Газы на гэтым тыдні заявіла, што за тры дні ў сектары ад голаду памерлі 33 чалавекі.
Дырэктар бальніцы «Аш-Шыфа» ў горадзе Газа, доктар Махамед Абу Сальмія, заявіў BBC, што ад недаядання ў сектары пакутуюць 900 тысяч дзяцей (г.зн., усе дзеці ў сектары). У ААН кажуць, што ад недаядання пакутуе пятая частка дзяцей Газы.
Ізраіль з мая ўвёў у сектары Газа новую сістэму дастаўкі і размеркавання гуманітарнай дапамогі: гэтым цяпер займаецца створаны Ізраілем і ЗША Гуманітарны фонд Газы (Gaza Humanitarian Foundation, GHF). Іншыя арганізацыі ад раздачы дапамогі наўпрост адхілены, а працаваць з GHF ААН і іншыя замежныя дабрачынныя арганізацыі адмаўляюцца.
Ізраіль тлумачыць, што новая сістэма спатрэбілася дзеля таго, каб не даць ХАМАС і іншым узброеным групоўкам забіраць гуманітарную дапамогу сабе. Да мая Ізраіль па тых жа меркаваннях блакаваў пастаўкі. Лідары Вялікабрытаніі, Францыі і Германіі ў пятніцу, абмеркаваўшы сітуацыю ў Газе па тэлефоне, выступілі з сумеснай заявай, заклікаўшы Ізраіль «неадкладна зняць абмежаванні на плынь гуманітарнай дапамогі».
«Гуманітарная катастрофа, якую мы назіраем у Газе, павінна спыніцца неадкладна, — гаворыцца ў іх сумесным звароце. — Блакіроўка неабходнай гуманітарнай дапамогі для мірнага насельніцтва недапушчальная».
Эмануэль Макрон, Кір Стармер і Фрыдрых Мерц «заклікаюць усе бакі спыніць канфлікт шляхам неадкладнага спынення агню», а таксама патрабуюць «безумоўнага вызвалення ўсіх закладнікаў», якіх утрымлівае ХАМАС з 7 кастрычніка 2023 года.
«Базавыя патрэбы мірнага насельніцтва, уключаючы доступ да вады і харчавання, павінны быць задаволеныя без далейшых затрымак», — настойваюць яны.
Краіны заклікаюць Ізраіль «неадкладна дазволіць ААН і гуманітарным недзяржаўным арганізацыям выконваць сваю працу па барацьбе з голадам».
Пры гэтым лідары агаворваюцца, што «раззбраенне ХАМАС з’яўляецца абавязковай умовай, і ў будучыні Газы ХАМАС ніякай ролі гуляць не павінен».
У гарах Кыргызстана з дрона адшукалі целы зніклых беларускіх альпіністаў8
Каментары