Беларус хацеў нелегальна правезці праз мяжу насенне цюльпанаў, цяпер можа страціць машыну
49-гадовы грамадзянін Беларусі спрабаваў перавезці праз мяжу з Польшчай партыю цыбулін цюльпанаў коштам каля 2,5 тысячы рублёў. У пункце пропуску «Казловічы» ён заявіў мытнікам, што нічога забароненага або абмежаванага пры сабе не мае, але гэта аказалася не так, паведамляе Дзяржаўны памежны камітэт.
Аўтамабіль Iveco праверылі з дапамогай сканера, пасля чаго накіравалі на падрабязны дагляд. Там мытнікі знайшлі 550 цыбулін цюльпанаў — прадукцыю з высокай фітасанітарнай рызыкай. Яе схавалі ў тайніках кабіны: за панэллю прыбораў, пад сядзеннямі і дэкаратыўнымі накладкамі.
У выніку тавар і грузавік 2023 года выпуску коштам каля 440 тысяч рублёў былі канфіскаваныя.
Брэсцкая мытня распачала адміністрацыйны працэс па арт. 15.1 КаАП. Мужчыну пагражае штраф да 30 базавых велічынь і канфіскацыя схаванага тавару разам з транспартам.
Каментары