Гомельскі губернатар пахваліўся, што сёлета ў рэгіёне стала больш першакласнікаў. Але леташнія лічбы гэтаму пярэчаць
Газета «СБ. Беларусь сегодня» паведаміла, што ў новым навучальным годзе ў Гомельскай вобласці нібыта стала больш першакласнікаў. У артыкуле са спасылкай на старшыню Гомельскага аблвыканкама Івана Крупко адзначалася, што за парты сёлета сядуць 14,8 тысячы першакласнікаў, што, паводле яго слоў, на 430 больш, чым у мінулым годзе. Але гэтае сцвярджэнне супярэчыць нават лічбам, якія той самы чыноўнік называў летась, заўважыў «Флагшток».
У жніўні 2024 года Іван Крупко публічна заяўляў, што ў вобласці будзе каля 15,5 тысячы першакласнікаў. Таму рэальная дынаміка якраз іншая: колькасць дзяцей зменшылася прыкладна на 700 чалавек, а не павялічылася на 430.
Пра тое, што дзяцей у школах робіцца менш, сведчыць і сітуацыя на месцах. У многіх школах Гомеля, асабліва ў тых, што знаходзяцца ў мікрараёнах з невысокай забудовай, адзначаецца недахоп вучняў. У выніку некаторых настаўнікаў прыйшлося скараціць.
Нягледзячы на гэта, кіраўнік вобласці падаў статыстыку як «пазітыўны сігнал», заявіўшы, што «павелічэнне колькасці першакласнікаў» — гэта прыкмета паляпшэння дэмаграфічнай сітуацыі і падстава для стратэгічнага планавання.
Але нават афіцыйныя даныя сведчаць пра іншае: за апошнія восем гадоў нараджальнасць у Гомельскай вобласці ўпала амаль у два разы.
З-за нізкай нараджальнасці ўлады адмаўляюцца ад планаў будаўніцтва новых школ у некаторых гомельскіх мікрараёнах. Напрыклад, у мікрараёне Шведская Горка школы цяпер няма, але Крупко тлумачыць, што побач праз два—тры прыпынкі ёсць установы, якія запоўненыя толькі на 60—65 %. Новыя будынкі ў такіх умовах, паводле яго, былі б эканамічна неапраўданымі, таму робіцца стаўка на мадэрнізацыю і прыбудовы да ўжо наяўных школ у тых раёнах, дзе сапраўды ёсць рост колькасці дзяцей (напрыклад, у Савецкім раёне Гомеля ці ў пасёлку Чонкі недалёка ад горада).
Афіцыйная статыстыка сведчыць таксама, што агульная колькасць вучняў у школах вобласці за год скарацілася на 1,8 тысячы — з 162,8 тысячы да 161 тысячы. Апроч гэтага, за апошні год у рэгіёне закрылі шэсць школ і адзін каледж.
Колькі трэба выкласці бацькам, каб сабраць у школу першакласніка
Сергеенка раптам загаварыў пра тое, колькі дзяржава траціць на аднаго школьніка
«Гэта калонія для непаўналетніх, а не школа!» Бацькі школьнікаў абураюцца забаронай на смарт-гадзіннікі
Настаўнікам у школах забаранілі карыстацца мабільнымі тэлефонамі падчас урокаў
Дзіцячы садок у Талачынскім раёне закрываць не будуць. Бацькі звярталіся да Лукашэнкі, і ён іх вырашыў пачуць
Каментары