На мінулым тыдні была прызначаная новая дырэктарка Нацыянальнага мастацкага музея, а цяпер стала вядома, што ў музеі адкрыецца выстаўка праўладнай і праваеннай мастачкі Святланы Жыгімонт, чыімі агіткамі раней грэбавалі ў прафесійнай супольнасці. Але выявілася, што не ўсё так проста.
Жыгімонт доўгі час сцвярджала, што яе творчасці не даюць ходу «ідэалагічныя дыверсанты», якія нібыта ў Мінкультуры і сталічных галерэях вырашалі пытанні выставак. У сваіх паведамленнях мастачка абвінавачвала арт-супольнасць у «прасоўванні выставаў з г*ўна і палак» і ў лабіяванні ідэалагічна няправільных аўтараў, тады як яе «патрыятычныя» работы застаюцца без увагі. У выніку апошнія гады Жыгімонт выстаўлялася пераважна ў Расіі.
Аднак цяпер сітуацыя змянілася: мастачка абвясціла адкрыццё сваёй выставы ў галоўным мастацкім музеі краіны — прычым зрабіла гэта літаральна за пяць дзён да мерапрыемства.
«Да апошняга моманту ўсё было хістка і незразумела…», — напісала праўладная мастачка. Аднак ніякага анонсу выставы на сайце музея дагэтуль няма.
Магло стварыцца ўражанне, што выстава стала магчымай дзякуючы прызначэнню новай дырэктаркі музея Ірыны Мацяс, жонкі аглядальніка АНТ Аляксандра Мацяса, і нібыта з гэтым звязанай зменай кірунку ў працы.
Аднак гэтыя здагадкі абвергла Святлана Карульская, карэспандэнтка тэлеканала АНТ у Маскве і сяброўка сям’і Мацясаў. Паводле яе слоў, анансаваная выстава не звязана з прыходам новай дырэктаркі. Гэта праект, падрыхтаваны яшчэ пры папярэдняй кіраўніцы.
«Гэта якраз паскробак нядаўна звольненай Ганны Конанавай. Яе, так бы мовіць, развітальная гастроль», — адзначыла Карульская ў сацсетках.
Жыгімонт не прамаўчала і рэзка адрэагавала на допіс Карульскай, які ўскрыў унутраныя канфлікты ў музейнай сферы. Яна абвінаваціла журналістку ў тым, што яе словы ствараюць уражанне, быццам Нацыянальны мастацкі музей — гэта «местачковы рынак, дзе хабалкі грызуць адна адной горла». І папракнула Карульскую, што яе абурэнне выклікала выстава, «прымеркаваная да 80‑годдзя Вялікай Перамогі».
Якія менавіта творы Жыгімонт падрыхтавала да выставы, прысвечанай перамозе над нацызмам, пакуль невядома. Аднак раней яна стварыла цэлую серыю ваенных партрэтаў «Родныя твары», мадэлямі для якой сталі ўдзельнікі нападу на Украіну.
Нагадаем, што Ганна Конанава, якая ўзначальвала музей з 2023 года, паводле неафіцыйнай інфармацыі, была звольненая пасля праверкі, якую правяла віцэ-прэм’ерка Наталля Пяткевіч. Кажуць, што падчас візіту чыноўніца засталася незадаволеная ўзроўнем парадку ва ўстанове.
Цяпер чытаюць
Вазіў натаўцаў у Афганістан і скідваў гуманітарку ў Судане, а потым трапіў у турму па даносе сябра з Украіны3
Каментары