Праца Яўгена Кузняцова амаль паўстагоддзя ўпрыгожвае Мінск.
Пра наданне твору мастацтва ахоўнага статусу паведаміла тэматычная суполка Belarusian Soviet Monumental ART.
Па інфармацыі актывістаў, некалькі дзён таму адбылося пасяджэнне Беларускай рэспубліканскай навукова-метадычнай рады па пытаннях гісторыка-культурнай спадчыны пры Міністэрстве культуры. Сябры рады аднагалосна падтрымалі прапанову аб наданні статусу гісторыка-культурнай каштоўнасці твору мастака Яўгена Кузняцова.
Гаворка ідзе пра маштабную размалёўку па керамічнай плітцы, вядомую як «Садоўніца», якая асіметрычна размешчана на галоўным фасадзе рэстараннага блока гасцініцы. Даследчыкі манументальнага мастацтва называюць гэтую працу «неймавернай» і адзначаюць, што аўтар падарыў Мінску «дыханне Сандра Бацічэлі». Цяпер гэты твор будзе знаходзіцца пад аховай дзяржавы.
Актывісты выказалі падзяку ўсім, хто спрычыніўся да гэтай падзеі, у тым ліку сястры мастака Надзеі Кузняцовай.
Шэдэўры савецкага мадэрнізму
Гасцініца «Планета», размешчаная ў Мінску на праспекце Пераможцаў, 31, была пабудавана ў 1980 годзе да Алімпіяды-80 па праекце архітэктараў Георгія Бенядзіктава, Уладзіміра Начарава і Тамары Раманоўскай. Комплекс складаецца з 12‑павярховага жылога корпуса і высунутага наперад прамавугольнага аб’ёму рэстарана, аздобленага туфам. Менавіта на ім і знаходзіцца пано Кузняцова.
Варта адзначыць, што рэстаран гасцініцы «Планета» з'яўляецца сапраўднай скарбніцай беларускага манументальнага мастацтва таго часу.
Інтэр'еры рэстарана, у тым ліку вестыбюль, зала і лесвіцы, былі аформленыя высакароднымі матэрыяламі: ракушачным туфам, чорным лабрадарытам і мармурам.
Акрамя работы Кузняцова, у афармленні бралі ўдзел і іншыя выбітныя творцы: кесонная столь залы аздоблена сюжэтнай арнаментальнай фрэскавай размалёўкай аўтарства Святланы Катковай, сцены аформлены дэкаратыўнымі керамічнымі пано мастакоў Мікалая Байрачнага і Валянціна Прыешкіна. Асаблівым акцэнтам інтэр'ера з'яўляецца вялізная люстра з нёманскага шкла.
На гэты момант невядома, ці атрымалі ахоўны статус іншыя творы мастацтва, якія знаходзяцца ўнутры будынка.
Трывожны сігнал з Аксакаўшчыны
Разам з радаснай навіной суполка Belarusian Soviet Monumental ART звярнула ўвагу на праблему з іншым творам Яўгена Кузняцова. Яго праца «Маладосць», якая знаходзіцца ў Аксакаўшчыне Мінскага раёна і стылістычна працягвае мінскую «Садоўніцу», зараз знаходзіцца пад пагрозай знішчэння. Прычынай гэтаму стаў запланаваны рамонт будынка, дзе яна размешчана. Абаронцы спадчыны заклікаюць звярнуць увагу на гэты аб'ект, каб не страціць унікальную спадчыну мастака.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары
так і ёсць